भरतपुर/रोटरी क्लब अफ नारायणी मिड टाउन (RCNMT) र नेपाल डेन्टल एसोसिएसन (NDA), चितवन शाखाको संयुक्त आयोजनामा क्लिनिकल फोहोरको वर्गीकरण तथा व्यवस्थापनसम्बन्धी प्रशिक्षण कार्यक्रम सम्पन्न भएको छ। भरतपुर अस्पतालको सभाहलमा आयोजित उक्त कार्यक्रममा रोटरियन साथै ४० भन्दा बढी दन्त चिकित्सक, डेन्टल हाइजिनिस्ट तथा अन्य दन्त स्वास्थ्यकर्मीहरूको सहभागिता रहेको थियो।
रोटरी क्लब अफ नारायणी मिड टाउनका अध्यक्ष भूपेन्द्र श्रेष्ठको अध्यक्षतामा सम्पन्न कार्यक्रममा नेपाल डेन्टल एसोसिएसन चितवन शाखाका अध्यक्ष Dr Roshan Acharya, भरतपुर अस्पतालका मेडिकल सुपरिटेन्डेन्ट डा. राम अधिकारी, प्रशासन अधिकृत डा. साईलगायत रोटरीका सदस्य तथा स्वास्थ्य क्षेत्रका विभिन्न व्यक्तित्वहरूको उपस्थिति रहेको थियो।
भरतपुर अस्पतालका फोहोर व्यवस्थापन फोकल पर्सन तथा क्लिनिकल फोहोर व्यवस्थापनका अनुभवी विज्ञ एवं प्रशिक्षक श्री डोलराज तिमिल्सिनाले प्रशिक्षण प्रदान गर्नुभएको थियो। कार्यक्रममा क्लिनिकल फोहोरको उचित वर्गीकरण, संकलन, व्यवस्थापन तथा सुरक्षित विसर्जनका विषयमा सैद्धान्तिक र प्रयोगात्मक दुवै विधिबाट प्रशिक्षण दिइएको थियो।
विशेषगरी स्वास्थ्य संस्थाबाट निस्कने विभिन्न प्रकारका फोहोरलाई स्रोतमा नै उचित रूपमा छुट्याउने, संक्रमणको जोखिम न्यूनीकरण गर्ने तथा वातावरणीय स्वच्छता कायम राख्ने विषयमा सहभागीहरूलाई व्यावहारिक ज्ञान प्रदान गरिएको थियो।
कार्यक्रममा सहभागी स्वास्थ्यकर्मीहरूले आगामी दिनमा आफ्नो कार्यस्थलमा क्लिनिकल फोहोरको उचित वर्गीकरण तथा व्यवस्थापनलाई प्रभावकारी रूपमा कार्यान्वयन गर्ने प्रतिबद्धता व्यक्त गरेका थिए।
रोटरीको वातावरण संरक्षण तथा रोग रोकथाम (Environment Protection and Disease Prevention) सम्बन्धी सेवामूलक अभियानअन्तर्गत आयोजना गरिएको यस कार्यक्रमले स्वास्थ्य संस्थाहरूमा सुरक्षित फोहोर व्यवस्थापनको अभ्यासलाई प्रवर्द्धन गर्नुका साथै स्वच्छ, सुरक्षित र स्वस्थ समाज निर्माणमा सकारात्मक योगदान पुर्याउने विश्वास आयोजकले लिएका छन्।
सुरक्षित स्वास्थ्य सेवा, स्वच्छ वातावरण र रोगमुक्त समाज निर्माणका लागि जिम्मेवार फोहोर व्यवस्थापन आजको आवश्यकता हो।
