काठमाडौँ/नेपाल डेरी एसोसिएसनले निर्वाचनको दिन वैशाख ३० गते दूध तथा दुग्ध पदार्थ ओसार पसार नरोक्न निर्वाचन आयोगसँग आग्रह गरेको छ। एसोसिएसनले सोमबार आयोगलाई ज्ञापनपत्र बुझाउँदै दूध तथा दुग्ध पदार्थ ओसारपसार गर्ने गाडीलाई निर्वाचनको दिन अन्य अत्यावश्यक बस्तु ढुवानी सरह सडकमा चल्न दिन आग्रह गरेको हो।आयोगले निर्वाचनका दिन उम्मेदवारबाहेक अत्यावश्यक गाडीलाई पास लिएर मात्र चल्ने व्यवस्था मिलाएको छ।
निर्वाचन आयोगले प्रकाशित गरेको सूचनामा अत्यावश्यक वस्तु अन्तर्गत दूध छुट्न गएकोले अब प्रकाशित हुने सूचनामा दूधलाई पनि समाबेश गराउन आयोगका सचिव गोकर्णमणि तिवारीलाई ज्ञनपन पत्र बुझाइएको एसोसिसनले जनाएको छ। । ज्ञापन पत्रमा एसोसिएसनले दुध एक अत्यावश्यक वस्तु भएकोले विगतका दिनमा देशभरि हुने हरेक बन्द, हड्ताल, महामारी एवं निर्वाचनको समयमा बिना रोकतोक दूध तथा दुग्ध पदार्थ ढुवानी गर्न पाइने कुरा हुँदाहुदै यस पटक यहि बैशाख ३० गते देशभर हुने स्थानिय निर्वाचनको दिन चल्न पाउने सवारी साधन भन्ने विषयको प्रकाशित सूचनामा अत्यावश्यक ढुवानी सवारी साधनमा दूध छुट्न गएकोले त्यसलाई समाबेश गराई ढुवानीमा सहजीकरण गर्न उल्लेख गरेको छ।
‘निर्वाचन आयोगबाट तोकिएका अत्यावश्यक वस्तु, खाद्यान्न, एम्बुलेन्स, पिउने पानी, दूतावासका सवारी साधन बिना रोकतोक चल्ने, अन्य सवारी साधनका लागि अनिवार्य पास लिनुपर्ने भनि जानकारी आएकोले दूध अत्यावश्यक वस्तु भएको र यो बालकदेखि वृद्धवृद्धासम्मका लागि दैनिक अनिवार्य नभई नहुने र यसलाई आजको आजै उपभोग गरिसक्नुपर्ने भएकोले नेपाल डेरी एसोसिएसनले यस पटकको स्थानीय निर्वाचनका लागि प्रकाशित सूचनामा दूध अत्यावश्यक वस्तु हो भन्ने कुरा छुटेकाले समावेश गराई सबै सम्बन्धित निर्वाचनको कार्यालयमा जानकारी गराई सहयोग गरि उक्त दिन दूध तथा दुग्ध पदार्थ ढुवानीमा सहजीकरण गरिदिनु हुन हार्दिक अनुरोध गरिन्छ’ महासचिव प्रल्हाद दाहालद्वारा हस्ताक्षरित निवेदनमा भनिएको छ।
