काठमाडौं/ विश्वविख्यात फोर्बस् म्यागेजिनको एशियाकै प्रभावशाली ३० वर्षमुनिका युवा सूचीमा सुजित पाठक पनि दएिका छन् । २९ वर्षीय सुजित पाठक ‘वेद’का म्यानेजिङ डाइरेक्टर हुन् । कक्षासम्म फेल भइराख्ने सुजितले २२ वर्षको उमेरमै आफ्नो दुई जना साथीहरु निर्देश द्वा र सज्जन पियासँग मिलेर स्कूल, अभिभावक र शिक्षकबीचको ग्याप चिर्नका लागि ‘वेद’ नामक एप बनाए ।

स्कूल, अभिभावक र शिक्षकको बीचमा कुराकानी र सञ्चार गर्ने यो एप अहिले नेपालको ८ सय वटा स्कूलमा प्रयोग भइरहेको छ । त्यस्तै जापान र ब्रुनाईको एक–एक वटा स्कुलमा पनि प्रयोग भइरहेको छ । यसका साथै ‘वेद’ एपको छिमेकी राष्ट्र भारत र बंगलादेशमा पाइलटिङ परियोजना चलिरहेको छ ।

सन् २०१६ मा एक लाख ५० हजार रुपैयाँ लगानी तथा एउटा टेवल र तीन वटा कुर्सीबाट सुरु भएको तीन युवाको आईटी परियोजना वेद अहिले ८० करोड मूल्यको ब्राण्ड बनिकसेको छ ।

फेसबुक चलाए जस्तै सजिलो

सन् २०१६ मा वेद एप इन्ग्रेल्स प्रालिले सञ्चालनमा ल्याएको ‘वेद’ विद्यालय व्यवस्थापनको सम्पूर्ण कार्य गर्ने सफ्टवयेयर हो । वेद एप्सलाई विद्यालय, शिक्षक र अभिभावकबीचको पुल पनि भन्न सकिन्छ । वेदले विद्यालयको आवश्यक डिजिटल प्रविधि, तालिम र परामर्श दिने गर्छ ।

म्यानेजिङ डाइरेक्टर सुजितका अनुसार साक्षर अभिभावकका लागि वेद एप्स सहज छ । उनका अनुसार फेसबुक चलाए जस्तै सजिलो छ यो प्रणाली । अभिवावकहरुले धेरै कुरा बुझेका छन् । अभिभावकहरुलाई सहज हुनेगरी यस एप बनाइएको छ, जहाँ नेपाली भाषा पनि रहेको छ ।

आइओएस तथा एन्ड्रोइड दुवै भर्सनमा उपलब्ध यस एपमार्फत् विद्यार्थीहरुको अनलाइन कक्षा सञ्चालन, गृहकार्य, हाजिरदेखि शुल्क व्यवस्थापनसम्म गर्न सकिन्छ । विशेषगरी वेदले दैनिक रुपमा विद्यालय र विद्यार्थीका गतिविधि कैद गर्ने उनको भनाइ छ ।

उनका अनुसार स्कूलको सूचना एपमा अपलोड गर्ने र एपमा आउने नोटिफिकेसनको अभिभावकहरुले रेस्पोन्स गर्न सक्नेछन् । विद्यार्थी स्कुल ढिला आएकोदेखि खाजा खाए नखाएको, बिरामी परे नपरेको सबै सूचना यसमार्फत दिन तथा लिन सकिन्छ । पछिल्लो समय स्कुलको सम्पूर्ण प्याकेज बस ट्रयाकिङ, टिफिन व्यवस्थापन, स्कुलको लेखाप्रणाली, शिक्षकको तलब सबै यही प्रणालीबाट पाठकको भनाइ छ ।

‘वेद’को पहिलो ग्राहक टेन्ट जेभियर्स

जुनसुकै कामको सुरुवाती दिन कठीन नै हुन्छन् । सुजित, निर्देश र सज्जनलाई वेद एप्सका लागि पहिलोपटक ग्राहक खोज्न निकै गाह्रो भएको थियो । तर, तीन युवामाथि विश्वास गर्ने पहिलो विद्यालय बनेको थियो सेन्ट जेभियर्स स्कूल । सेन्ट जेभियर्ससँग स्विकृति पाउन पनि उनीहरुलाई हम्मे हम्मे परेको थियो ।

भेट्न समय नपाइरहेका बेला सेन्ट जेभियर्सका फादरले उनीहरुलाई अचानक ३० मिनेटभित्र आउने अल्टिमेट दिएको थियो । फादरले सो समयभित्र आए एप लिने अन्यथा नलिने भनि उनीहरुलाई धम्काएपनि समय नकट्दै हतार–हतार उनीहरु सेन्ट जेभियर्स पुगे र अन्ततः एप लिन पनि मनाए । सुरुवातमै शिक्षा क्षेत्रमा परिचित नाम सेन्ट जेभियर्सले उनीहरुलाई मौका दियो । त्यसपछि उनीहरुले फर्केर हेर्नु परेको छैन ।

पहिलो वर्ष नै १५ वटा स्कुलमा वेद एप्स सञ्चालन

सेन्ट जेभियर्सको विश्वास जितेसँगै सुरुवात भएको पहिलो वर्ष नै १५ वटा स्कुलमा वेद एप्स सञ्चालन गरिएको थियो । सेन्ट जेभियर्सपछि वेद एप्सका लागि ३ दिनमा नै अन्य ४ वटा विद्यालयबाट प्रस्ताव आएको थियो । त्यसका लागि १५ दिन उनीहरुले रातभर काम गरेका थिए । यसरी एकपछि अर्को स्कुल गर्दै, विद्यालय र ग्राहककै भरमा वेद एप्स फैलँदै गएको छ ।

कम्पनी विस्तार हुने क्रममा ८ वर्षमा ८ सय स्कुल वेदसँग आबद्ध रहेका रहेका पाठक बताउँछन् । उनले ८ सय स्कुलमध्ये आफूहरुले मुश्किलले २ देखि ३ सय स्कुलमा डोर टू डोर पुगेको बताउँछन् । बाँकी सबै ग्राहकहरुले नै गरेको प्रचारबाट आफूहरुको सेवाग्राही थपिएका उनको भनाइ छ ।

जापान र ब्रुनाईमा वेद एप्स

वेद एप्स नेपालमा मात्र नभएर विदेशसम्म पुगिसकेको छ । ब्रुनाई र जापानको एक–एक वटा स्कुलमा वेद लन्च गरिएको पाठक बताउँछन् । यसका साथै बंगलादेश र भारतमा पनि पाइलटिङ भइरहेको छ । वेद एपले स्कुलको आवश्यकताअनुसार काम गर्ने उनको भनाइ छ ।

वार्षिक कारोबार ६ करोड रुपैयाँ बढी

सन् २०१६ मा एउटा सानो कोठामा एउटा टेबलमा सीईओ निर्देश झा, सीओओ सन्जन पिया र एमडी सुजित पाठक (तीन जना) बसेर काम थालेका थिए । कम्पनी सुरु गर्दा उनीहरुले प्रतिब्यक्ति ५० हजार रुपैयाँका दरले १ लाख ५० हजार रुपैयाँ लगानी गरेका थिए ।

तर सात वर्षमा कम्पनीको दायरा र सफलता फराकिलो भएसँगै कम्पनीको भ्यालुएसन ८० करोड रुपैयाँ पुगेको छ । वेद एप्सको वार्षिक कारोबार ६ करोड रुपैयाँ भन्दा बढी भएको सुजितको दाबी छ । उक्त सफलताको पछाडि यी तीन युवाहरुको अथक प्रयास, लगाव, मिहेनत र योगदान रहेको छ ।

मासिक २ लाख भन्दा बढी आउटसोर्सिङ गरेर कमाइरहेका युवाहरुले पैसालाई चटक्कै माया मारेर एक वर्ष शून्य पारिश्रमिकमा काम गरेका थिए ।