रत्ननगर/चितवनलाई खेलकुदको राजधानी बनाउने चर्चा सँगै निजि क्षेत्र समेत खेलकुदमा लगानीका लागि अगाडी बढिरहेको परिप्रेक्ष्यमा रत्ननगर–०१ बकुलहर (पुरानो ज्योति हल) स्थित सेभ सुपमर्किटको तेस्रो तल्लामा रोलर स्केट पार्क गु्रपद्वारा स्केट पार्कको शुभारम्भ गरिएको छ । उक्त स्केट पार्क नेपालको अन्य स्केट पार्क भन्दा फरक एवम् एसी सहितको थ्रिडि म्युजियम हलभित्रमा स्केट खेली मनोरञ्जन लिन सकिने र चितवनमा स्केटका नयाँ खेलाडी उत्पादन गर्न र खेल प्रति युवा पुस्तालाई आकर्षण गर्न यो स्केट पार्क संचालनमा ल्याइएको सञ्चालकहरु बताउँछन् ।

रोलर स्केट पार्कको नामाकरण दिइएको उक्त पार्कमा खेलमा सहभागी खेलाडीहरुलाई आवश्यक सामाग्रीका साथै अन्य आवश्यक सुबिधाहरु उपलब्ध गराइने, खेलाडीहरुलाई आवश्यक पर्ने जुत्ता हातखुट्टा मा लगाउने सेफ्टी बेल्ट र हेल्मेटका लगायतका सामाग्रीहरु समेत उपलब्ध गराइने लक्ष्य लिइएको छ ।

दुई करोड लगानीमा सञ्चालन गरिएको स्केट पार्कमा १ घण्टामा १५० जनाले सजिलै सँग खेल्न सक्ने छन् भने, स्केट पार्कमा खेलाडीहरुलाई दुर्घटना बिमाको लागि आवश्यक ब्यबस्था समेत गरिएको छ । घरमा बसेर इन्टरनेटमा समय बिताएर स्वास्थ्य लाई बिगार्न भन्दा यसले स्वास्थ्य मा समेत सकारात्मक प्रभाब पार्ने हुँदा स्केट पार्कमा ५ वर्ष देखि ५० वर्ष सम्मका व्यक्तिले मनोरञ्जन गर्न सक्ने छन् ।