भरतपुर/बागमती प्रदेश सभा सदस्य रीना गुरूङले तमू सञ्चारकर्मी संघ (एटजोन) चितवनको लागि अक्षयकोष स्थापना गरिदिने भएको छ । सोमबार संघको जिल्ला शाखाको पदाधिकारी तथा केन्द्रीय समितिका सचिव तथा कार्यसमिति सदस्यहरूसँगको विशेष भेटका क्रममा राप्रपाकी केन्द्रीय सह–महामन्त्रीसमेत रहेकी सांसद गुरूङले आफ्नोतर्फबाट संघको लागि जस्तोसुकै सहयोग गर्न पनि तयार रहेको बताएकी हुन् । नेतृ गुरूङले कम्तिमा पनि एक लाख रूपैयाँ बराबरको अक्षयकोष स्थापना गरिदिने बचन दिएकी हुन् ।

सोमबार भएको भेटघाटमा एटजोन चितवनका अध्यक्ष तुलमान गुरूङ, सचिव राजनदिल गुरूङ, सह–सचिव गीता गुरूङ, सदस्यहरू ममता गुरूङ र कमला गुरूङ तथा केन्द्रीय सचिव चित्र ‘सोल्टी’ गुरूङ, केन्द्रीय सदस्य सीतादेवी तमुस्यो, तमू (गुरूङ)लगायतको उपस्थिति थियो ।

संघको लागि तमू ह्युल छोँज धीँ गुरूङ राष्ट्रिय परिषद चितवनले कार्यालय समेत उपलब्ध गराएको छ । महाबौद्ध गुम्बा तीनखोलेस्थित तमू ह्युल छोँज धीँ चितवनले निर्माण गरेको संग्रहालय भवनमा कार्यालयको लागि कोठा उपलब्ध गराएको अध्यक्ष गणेशबहादुर गुरूङले बताए ।

यस्तै संघको कार्यालय संचालनका परिषद्ले कोठा उपलब्ध गराइसकिएकोले छिट्टै एक कार्यक्रमको आयोजना गरि कार्यालय उद्घाटन र संचालन गरिने तमू (गुरूङ) सञ्चारकर्मी संघ नेपाल चितवनका अध्यक्ष तुलमान गुरुङले बताए।