भरतपुर/चितवन उद्योग संघको ३३ औं स्थापना दिवस विविध कार्यक्रम गरी मनाइयो । चितवन उद्योग संघका अध्यक्ष त्रिलोचन कँडेलको अध्यक्षता सम्पन्न कार्यक्रममा अध्यक्ष कँडेलले स्वागत एवम् कार्यक्रमको उद्देश्य माथि प्रकाश पार्नुभएको कार्यक्रममा संघ स्थापनाकालका संस्थापक अध्यक्ष पदाधिकारी एवम् सदस्यहरु, नेपाल सरकार तथा प्रदेश सरकारबाट सम्मानित पूर्व अध्यक्ष र स्थानीय निर्वाचनमा निर्वाचित संघका सदस्यलाई सम्मान गरिएको थियो ।

कार्यक्रम अन्तर्गत चितवन उद्योग संघको संस्थापक समिति (२०४७ साल आषाढ ५ गतेदेखि २०४७ साल आषाढ १३ गतेसम्म) मा रही संघको स्थापना गर्न महत्वपूर्ण भूमिका खेलेको भन्दै संस्थापक अध्यक्ष दिल बहादुर ताम्राकार, संस्थापक सचिव खिमलाल भण्डारी, संस्थापक सदस्यहरु रमाकान्त खरेल, केदार श्रेष्ठ, बिष्णु भण्डारीलाई संघको ३३ औं स्थापना दिवसको अवसरमा सम्मान गरिएको थियो ।

सोही अवसरमा नेपाल सरकारबाट छैटौं संविधान दिवस (२०७८/०६/०३) को अवसरमा प्रबल जनसेवाश्री मानपदवीबाट र गणतन्त्र दिवस–२०७९ को अबसरमा बागमती प्रदेश सरकारबाट उत्कृष्ट उद्यमीको रुपमा उद्यमशिलता पुरस्कारद्वारा सम्मानित हुनुभएको भन्दै संघका पूर्व अध्यक्ष भेषराज दुवाडीलाई समेत सम्मान गरिएको थियो । चितवन उद्योग संघका संस्थापक अध्यक्ष दिल बहादुर ताम्राकारद्वारा दिप प्रज्ज्वल र पूर्व अध्यक्षज्यूहरुबाट गमलामा पानी हालेर उद्घाटन गरिएको कार्यक्रममा नेपाल सरकार तथा प्रदेश सरकारबाट सम्मानित हुनुभएका पूर्व अध्यक्ष भेषराज दुवाडी, चितवन उद्योग संघ संस्थापक समितिका सदस्य बिष्णु भण्डारी, चितवन उद्योग संघका निवर्तमान अध्यक्ष एवम् पूर्व अध्यक्ष मण्डलका अध्यक्ष राजु पौडेल, चितवन उद्योग संघका पूर्व अध्यक्ष एवं गभर्निङ काउन्सिलका अध्यक्ष सोमराज महरठ्ठाले संघ दिवसको अवसरमा आफ्नो अनुभूति सहित शुभकामना व्यक्त गर्नुभएको थियो ।