भरतपुर/जुन ५ अर्थात विश्व वातावरण दिवसको अवसर पारेर नारायणी पब्लिक इङ्गलिस स्कुल भरतपुरले एक मात्र विश्व शिर्षकमा आधारीत रहेर अन्तर विद्यालय पोष्टर डिजाइन प्रतियोगीता सम्पन्न गरेको छ । प्रतियोगीतामा बालकुमारी आवासीय माध्यमिक विद्यालयकी छात्रा शृष्टि कुमारी गुप्ता प्रथम भएकी छन् । प्रतियोगीतामा ग्लोरियस आवासीय माध्यमिक विद्यालयकी छात्रा प्राची रिमाल द्वितिय र बालकुमारी आवासीय माध्यमिक विद्यालयकी छात्रा स्वेच्छा विश्वकर्मा तृतिय भएकी छन् । प्रतियोगीतामा १८ विद्यालयका ३६ जना विद्यार्थीहरुको सहभागीता रहेको थियो । प्रतियोगीहरुलाई २ घण्टाको समय दिइएको थियो ।

प्रतियोगीताको निर्णायकमा विगत २२ वर्ष देखि वातावरण विटमा पत्रकारीता गर्दै आउनु भएका वातावरण पत्रकार कोमल चन्द्र भगत रहनुभएको थियो । नारायणी पब्लिक इङ्गलिस स्कुलका शिक्षक नविन बगालेले संयोजन गर्नुभएको पोष्टर डिजाइन प्रतियोगीता कार्यक्रम विद्यालयका प्राचार्य वेदराज न्यौपानेको अध्यक्षतामा सम्पन्न भएको थियो । यस विद्यालयले विभिन्न समयमा रचनात्मक कार्यक्रमको आयोजना गर्दै आएको छ । विद्यालयले स्थापना काल देखि नै चित्रकला, पोष्टर डिजाइन जस्ता प्रतियोगीता निरन्तर गर्दै आएको छ ।