काठमाण्डौं/विगत २५ वर्षदेखि नेपाली बजारमा अन्तर्राष्ट्रिय गुणस्तरको आफ्ना उत्कृष्ट उत्पादनहरु ल्याईरहेको जस्मिन पेन्टस् प्रा.लि.ले आइतबार आफ्नो शुभारम्भको २५औं वर्षको अवसर पारेर रजत जयन्ती मनाएको छ ।

चितवन उद्योग संघको सदस्य उद्योग जस्मिन पेन्टस् प्रा.लि. का प्रबन्ध निर्देशक एवं चितवन उद्योग संघका उपाध्यक्ष लक्ष्मण प्रसाद अर्यालको सभापतित्वमा सम्पन्न रजत जयन्ती समारोहमा नेपाल सरकारका उपप्रधान तथा रक्षामन्त्री ईश्वर पोखरेल प्रमुख अतिथि रहनुभएको थियो ।
जस्मिन पेन्टस्का प्रबन्ध निर्देशक एवं चितवन उद्योग संघका उपाध्यक्ष लक्ष्मण प्रसाद अर्याल लगायत पेन्टस् परिवारलाई चितवन उद्योग संघले हार्दिक बधाई एवं शुभकामना व्यक्त गरेको छ । रजत जयन्ती समारोहमा चितवन उद्योग संघले जस्मिन पेन्टस्ले २५ औं वर्ष पार गरेको उपलक्ष्यमा पेन्टस् परिवारले आगामि दिनमा अझ सम्पूर्ण ग्राहकहरुको मन जित्न सफल होस् भन्दै शुभकामना पत्र समेत प्रदान गरेको थियो । चितवन उद्योग संघका अध्यक्ष भेषराज दुवाडीले जस्मिन पेन्टस्का प्रबन्ध निर्देशक लक्ष्मण प्रसाद अर्याललाई उक्त बधाई पत्र हस्तान्तरण गर्नुभएको हो ।

बधाई पत्र हस्तान्तरण कार्यक्रममा नेपाल उद्योग परिसंघका उपाध्यक्ष एवं चितवन उद्योग संघका पूर्व अध्यक्ष कृष्णप्रसाद अधिकारी बरिष्ठ उपाध्यक्ष राजु पौडेल, उपाध्यक्ष त्रिलोचन कँडेल, कार्यकारी निर्देशक गणेश प्रसाद सिलवाल, कार्यसमिति सदस्यहरु मदन चिरञ्जीवी पोखरेल, दुर्गाप्रसाद भण्डारी, गजेन्द्र अधिकारी, युग राज वस्ती, गोपाल गैरे, हरिप्रसाद भट्ट, प्रशासकीय अधिकृत गोविन्द प्रसाद पौडेल, सञ्चार अधिकृत राजु भट्टलगायतको उपस्थिति रहेको थियो ।

रजत जयन्तीको अवसरमा जस्मिन पेन्टस् प्रा.लि.ले सामाजिक उत्तरदायित्व वहन गर्दै आदर्श गृह, मानव सेवा आश्रम, मिरिका फाउण्डेशन, धुर्मुस सुन्तली फाउण्डेशन लगायतका क्षेत्रमा आर्थिक एवं सामाग्री सहितको सहयोग गर्ने घोषणा समेत गरेको छ । रजत जयन्तीको अवसरमा नेपाल हाँस्यव्यग्य क्षेत्रका कलाकार मह जोडी (मदनकृष्ण श्रेष्ठ र हरिवंश आचार्य), पूर्वअर्थमन्त्री सुरेन्द्र पाण्डे, नेपाली काँग्रेसका नेता गगन थापा, माननीय सभासद् कृष्णभक्त पोखरेल, नेपाली काँग्रेस चितवनका सभापति जितनारायण श्रेष्ठ, नेपाल उद्योग परिसंघका अध्यक्ष सतिष मोर, चितवनका विभिन्न वडाका वडाअध्यक्ष, उद्योगी व्यवसायी एवं सञ्चारकर्मीहरुको उल्लेख्य सहभागिता रहेको थियो । कार्यक्रमसँगै विभिन्न साँङगीतिक प्रस्तुतिहरु समेत प्रस्तुत गरिएको थियो ।