रत्ननगर/“रत्ननगर महोत्सव हाम्रो पहिचान, व्यवसायिक कृषि र पर्यटन प्रवद्र्धन हाम्रो अभियान” भन्ने उद्देश्यले समग्र चितवनको गौरव र गरिमामय प्रस्तुति रत्ननगर महोत्सव २०७८ को ११औं संस्करण हुने भएको छ ।

विगत दुई दशकदेखी प्रत्येक दुई–दुई वर्षमा आयोजना हुने महोत्सवले समग्र जिल्ला तथा विशेष गरी पूर्वी चितवन र रत्ननगरको कृषि, पर्यटन,शिक्षा, स्वास्थ्य, विज्ञान, प्रविधि, कला, संस्कृति, व्यापार, व्यवसाय र अन्य आर्थिक महत्वका क्षेत्रहरुको आधुनिकीकरण र वैज्ञानिक उत्पादन प्रणालीसंग अभिमुखीकरण गराउने प्रमुख उद्देश्य लिएको छ । विगत देखिनै रत्ननगर उद्योग वाणिज्य संघले नेपाली उत्पादनहरुको बजार प्रवद्र्धनका साथै स्थानीय कृषि, पर्यटन, शिक्षा र स्वास्थ्यको विकास र बिस्तारमा अग्रसर रहि १० औं पटक महोत्सव सफलता पुर्बक सम्पन्न गरिसकेको रत्ननगर नगरपालिकाको संरक्षकत्व र रत्ननगर उद्योग वाणिज्य संघको आयोजनामा मिति २०७८ पौष २७ देखि माघ ८ गते (तदनुसार ११ देखि २२ जनवरी २०२२) सम्म रत्ननगर नगरपालिका स्थित टिकौली चौरमा ११औं संस्करणको रुपमा रत्ननगर महोत्सव–२०७८ को आयोजना गर्न लागिएको रत्ननगर महोत्सव २०७८ का मूल आयोजक समिति संयोजक अनिल कृष्ण श्रेष्ठले बताउनुभयो ।
महोत्सवमा उद्योग, व्यापार, कृषि, पर्यटन, स्थानीय कला र संस्कृति सहित राष्ट्रिय, अन्तराष्ट्रिय तथा बहुराष्ट्रिय गरि करिब ३५० स्टलहरु रहने छन् । यस पटकको महोत्सवमा तिन लाख भन्दा बढी दर्शकहरुले अवलोकन गर्ने र करीब १५ करोडभन्दा बढिको कारोबार हुने अपेक्षा र अनुमान गरिएको छ ।

चितवनवासीहरुले गौरव र पर्वको रुपमा मान्दै आएको रत्ननगर महोत्सव व्यापार र व्यवसायको जगतमा उत्कृष्ट र अनुपम नमुनाको रुपमा रहेको छ । बृहत व्यवसायिक कृषि प्रर्दशनी तथा प्रतियोगिता, ताजा तरकारी, थोपा सिंचाई प्रविधि, केरा, माछा, च्याउ, दुग्धजन्य पदार्थ, पोल्ट्री, महसंगै चितवनमा प्रबल सम्भावना भएका कृषि तथा पशुजन्य व्यवसायलाई विशेष जोड दिइएको आयोजको दावी छ । स्थानीय स्तरमा उत्पादित ताजा तरकारी, फलफुल, दुग्ध जन्य पदार्थ, पोल्ट्री लगायत कृषि व्यवसायसंग सम्बन्धित विभिन्न सेवा, प्रविधि एवम् मल विउ विजनहरु महोत्सवमा प्रदर्शनको व्यवस्था गरिने छ । महोत्सव अवधिभर कृषिसंग सम्बन्धित विभिन्न गोष्ठी, अन्र्तक्रिया कार्यक्रम, चितवनको आर्थिक विकास र उन्नयनका लागि विशेष आर्थिक क्षेत्रको स्थापना र चुनौती विषयक गोष्ठी पनि संचालन गरिने छ । महोत्सवमा माछापालनमा नयां वायोफ्लक प्रविधि प्रदर्शनी साथै माछापालन गर्ने तरिका तथा बजारीकरणको विषयलाई पनि प्राथमिकतामा राखिएको छ । माछापालन व्यवसायको प्रर्वद्धनको लागि महोत्सवमा माछाको भूराको प्रर्दशनी, अत्याधुनिक माछासहितको पोखरी, माछालाई आवश्यक पर्ने औषधि तथा दानाका स्टलहरु, चेतनामुलक सामाग्री, श्रव्यदृश्य तथा सेमिनार गरिने छ ।
महोत्सबमा पनि पर्यटन प्रवद्र्धनका कार्यक्रम अन्र्तगत चितवनका प्रमुख पर्यटकीय गन्तव्य सौराहा, टिकौली होमस्टे, चेपाङ वस्ती र समाजसंग साक्षात्कार हुन पहाडी पदयात्रा मार्ग, सिराइचुली, उपरदाङगढी, रत्ननगर क्षेत्रका टिकौली ताल, चेपाङ ताल, बिसहजार ताल, टिकौलीमा रहेको जैविक विविधता सुचना केन्द्रको प्रचार प्रसार्का व्यवस्था पनि मिलाइएको छ । अटो, कृषि, शैक्षिक, पशुपंक्षी व्यवसायसंग सम्बन्धित छुट्टैे परिसर रहने छ । विगतका बर्षमा जस्तै बालबालिकाहरुका लागि फनपार्क परिसरले पनि निरन्तरता पाउने छ ।
विगतमा जस्तै महोत्सव अन्र्तगत पौष २९ देखि ३ गते सम्म ५ दिन रत्ननगरको टांडी बजारमा विभिन्न जनजातीहरुको विशेष खाना, उपभोक्ताहरुलाई गुणस्तरीय उत्पादन उपभोगका लागि मासुका विशेष परिकार सहित चौथौं पटक चिकेन एण्ड एग फुड फेस्टिबल आयोजना गरिएको छ ।

रत्ननगर महोत्सबमा राष्ट्रिय स्तरमा ख्याति प्राप्त कलाकारको मनोरञ्जनात्मक सांगीतिक प्रस्तुति तथा स्थानीय स्तरका उदयमान तथा अवसरबाट वञ्चित प्रतिभाका कला प्रष्फुटन अवसर महोत्सव अवलोकनकर्ताको आकर्षण हुने गरेको छ । यस बर्ष अझ भब्य र व्यवस्थित सांस्कृतिक कार्यक्रम प्रदर्शन गर्ने तयारी गरिएको छ । विभिन्न आदिवासी जनजातीका भेषभुषा तथा नृत्य सहितको कला संस्कृती प्रदर्शन गरिने छ ।
महोत्सवको उद्घाटनको अवसरमा विभिन्न जनजाती, धार्मिक, सांस्कृतिक, शैक्षिक तथा अन्य संघ संस्थाको सहभागितामा बाजा र झांकी सहितको शोभायात्रा निकालिने छ । चितवनको विविध गतिविधि समाविष्ट भएको “रत्ननगर महोत्सव स्मारिका” पनि प्रकाशित गरिनेछ । सुरक्षाको दृष्टिकोणले महोत्सवलाई पूर्ण अत्याधुनिक सिसिटिभिबाट निरीक्षण गरिनेछ भने ५ करोड बराबर विमाको व्यवस्था गरिएको छ ।