रत्ननगर/रत्ननगर नगरपालिका वडा नं ७ मा आधारभूत स्वास्थ्य सेवा केन्द्र उद्घाटन गरिएको छ । नगरका सबै वडामा स्वास्थ्य चौकी स्थापना गर्ने नगरपालिकाको आयोजना अन्तर्गत वडा नं ७ मा मंगलवार स्वास्थ्य सेवा केन्द्र उद्घाटन गरिएको हो । मेयर नारायण वन र वडाध्यक्ष लालबहादुर भट्टले सयुक्त रुपमा केन्द्रको उद्घाटन गरेसंगै मंगलवारबाटै सेवा सुरु गरिएको छ । सो अबसरमा मेयर वनले ग्रामिण भेगका नगरबासीलाई स्वास्थ्य सेवा प्रदान गर्न नगरका १६ वटै वडामा स्वास्थ्य चौकी सञ्चालनमा ल्याइएको बताए । स्वास्थ्य सेवा पाउन नागरिकको अधिकार हो उनले भने नगरवासीलाई स्वास्थ्य सेवा दिन हामी सचेत छौं ।

वडाध्यक्ष भट्टले स्वास्थ्य समस्या लिएर वडाबासी भौतारिन नपरोस भनेर आधारभूत स्वास्थ्य केन्द्र सञ्चालनमा ल्याइएको बताए । सो स्वास्थ्य केन्द्रबाट प्राथमिक स्वास्थ्य सेवा अन्तर्गत खोप सेवा,परिवार नियोजन,गर्भवती जाँच,पोषण कार्यक्रम,क्षयरोग,मलेरिया,डेँगु नियन्त्रण तथा स्वास्थ्य परामर्श सेवा प्रदान गरिने स्वास्थ्य शाखा प्रमुख माधव प्रसाद पौडेलले जानकारी दिए । वडाध्यक्ष भट्टको अध्यक्षतामा भएको कार्यक्रममा एमाले वडा कमिटी अध्यक्ष सुर्यबहादुर तामाङ,बाघमारा मध्यवर्ती सामुदायिक वनका अध्यक्ष जितु तामाङ,एकता टोल विकास संस्थाका अध्यक्ष रामजी अधिकारी लगायतले मन्तव्य राखेका थिए । वडा सचिव पदमराज सापकोटाले कार्यक्रम सञ्चालन गरेका थिए ।