राप्ती /पूर्वी चितवनको राप्ती तनाव ग्रस्त राप्ती नगरपालिका–३ का स्थानीयहरु आक्रोशित बनेका छन् । जंगलमा मृत अवस्थामा फेला परेकी २३ वर्षीया सुजिता भण्डारीको शव उठाएर पोष्टमाटमका लागि प्रहरीले अस्पताल लैजाँदै गर्दा स्थानीयले शवलाई रोकेका हुन् । उनीहरुले पूर्वपश्चिम राजमार्ग अवरुद्ध गराएका छन् । चितवनका प्रहरी प्रमुख एवम् प्रहरी उपरीक्षक एसपी चढेको गाडीलाई स्थानीयले घेराउ गरेका छन् । यस्तै राप्ती नगरपालिका प्रमुख प्रभा बराललाई पनि स्थानीयले घेरेका छन् । उनीहले जनप्रतिनिधिका हैसियतले न्यायका लागि भूमिका खेल्न आग्रह गरिरहेका छन् ।

सुजिता असार ११ गतेदेखि हराइरहेकी थिइन् । असार ११ गते बिहान ६ बजे साथीको घर जाने भनेर हिँडेकी सुजिता सोही दिनदेखि वेपत्ता भएकी थिइन् । हराएको १० दिनसम्म पनि प्रहरीले घटनाबारे केही अनुसन्धान गर्न नसकेको भन्दै स्थानीयहरु प्रहरी प्रशासनविरुद्ध खनिएका हुन् । अहिले राप्ति नगरपालिका ३ स्थित राजमार्ग क्षेत्र तनावग्रस्त रहेको छ । स्थानीयहरुले ट्रक बाटोमा तेर्साएर सडक अवरुद्ध गरेको छन् । जङ्गलमा च्याउ टिप्न गएका स्थानीयवासीहरुले आइतबार साँझ शव देखेपछि प्रहरीलाई खबर गरेका थिए । वनको बीचमा एउटा झाङमा अड्किएको अवस्थामा उनको शव फेला परेको प्रहरीले जनाएको छ । शव गलेको अवस्थामा फेला परेको छ ।