चितवन – उद्योग वाणिज्य संघ चितवनले व्यवसाय सञ्चालनका लागि माग गरेको छ । उद्योग वाणिज्य संघ–चितवनले चितवनका प्रमुख जिल्ला अधिकारी प्रेमलाल लामिछानेलाई ज्ञापनपत्र बुझाउंँदै उक्त माग गरेको हो । संघले ज्ञापन पत्र मार्फत गर्दै कोभिड १९ को दोस्रो लहरको रोकथाम तथा नियन्त्रणका लागि गरिएको निषेधाज्ञा उद्यमी व्यवसायीले पालना गरेको र हाल कोरोना संक्रमण दर घट्दो क्रममा रहेकोले आलोपालो गरी उद्यम,व्यवसाय सञ्चालनको व्यवस्था गर्न माग गरेको छ ।
संघका अध्यक्ष श्रेष्ठ कोरोना संक्रमणको अवस्था लगायत अन्य विपद्को समयमा निजी क्षेत्रको तर्फबाट संस्थागत सामाजिक उत्तरदायित्व अन्तर्गत रहि सरकारलाई सहयोग गर्दै आएको र आवश्यक परेको खण्डमा आगामी दिनमा पनि सहयोग गर्न तत्पर रहेको बताए । उनले उद्यम व्यवसाय ठप्प हुँदा व्यवसायी मार पर्नुका साथे दिर्घकालमा राष्ट्रिय अर्थतन्त्रमा समेत नकारात्मक असर देखिने बताए ।
नयाँ भेरियन्ट सहितको दोश्रो लहरको रोकथाम तथा नियन्त्रणका लागि जारी निषेधाज्ञा असार १० गतेसम्म रहेको कारण असार ११ गते देखि स्वास्थ्य मापदण्ड पालना गर्ने गरि व्यवसाय सञ्चालनको व्यवस्था गर्न उनको माग छ । ज्ञापन पत्र बुझ्दै प्रमुख जिल्ला अधिकारी प्रेमलाल लामिछानेले संघले तयार गरेको विषयगत तालिकालाई अध्ययन गरि निर्णय गरिने बताए । प्रजिअ लामिछानेले आगामी दिनमा हुने निर्णय परिस्थितिको अध्ययन गरि उद्यमी व्यवसायीको समन्वयमा हुने समेत बताए ।
व्यवसाय सञ्चालनका लागि गरिएको माग पत्र बमोजिम अत्यावस्यक वस्तु तथा सेवा वाहेक संघमा आवद्ध भएका ३६ वटा वस्तुगत संघ माताहतका व्यवसायहरु, उद्योग कलकारखानालाई दैनिक ६ घण्टाका दरले हप्ताको ५ दिन आलोपालो पद्धती बमोजिम सञ्चालन गर्नका लागि अनुरोध गरिएको संघका कार्यकारी निर्देशक निलबहादुर केसीले जानकारी दिए ।
यसै गरि यातायातका सन्दर्भमा जोर विजोर प्रणाली बमोजिम तथा होटल तथा लजका सम्बन्धमा भौतिक दुरी कायम गर्ने गरि सञ्चालनका लागि माग गरिएको संघको सचिवालयले जानकारी दिएको छ । कार्यक्रममा संघका वरिष्ठ उपाध्यक्ष चुननारायण श्रेष्ठ,उपाध्यक्षत्रय सुमनकुमार श्रेष्ठ, चिरञ्जिवि सुवेदी भोजराज कौडाल र संघका कार्यकारी निर्देशक निलबहादुर केसीको उपस्थिति रहेको थियो ।
