भरतपुर/नेपाल पावर लिफ्टिङको सहयोगमा नेपालकै इतिहासमा पहिलो पटक रुप कार्की मेमोरियलको स्मृतिमा सबभन्दा बलियो (स्टोन्गेष्ट) राष्ट्रव्यापी पावर लिफ्टिङ प्रतियोगिता सम्पन्न भएको छ । चितवनको सबैभन्दा जेठो जिम हाउस चितवन जिम हाउसले पनि उक्त प्रतियोगितामा आफ्नो प्रतिनिधित्व गरेको थियो ।
देशैभरका विभिन्न जिल्लाहरुका जिम हाउसहरुबाट सहभागीता जनाईएको प्रतियोगितामा चितवन जिम हाउस गैंडाकोट शाखाका जिम प्रशिक्षक रिक्की राईले प्रतिनिधित्व गरेका थिए । राईले देशैभरबाट खेलमा भाग लिएका प्रतिस्पर्धीहरुलाई पछि पार्दै तेश्रो स्थान हासिल गरेका हुन । उनले ८३.१ देखि ९३ के.जी. पुरुषतर्फ स्क्वाटमा २२५, बेन्च प्रेसमा १२५, डेडलिफ्टमा २३० सहित तीन वटा क्याटागोरी गरी ५८० अंक सहित तेश्रो स्थान हुन सफल भए ।
चितवन जिम हाउसले पावर लिफ्टिङ प्रतियोगितामा आफ्नो संस्थाको तर्फबाट सहभागी भई तेश्रो स्थान हासिल गरेको भन्दै आज एक विशेष कार्यक्रमको आयोजना गरी बिजेता रिक्की राई लगायत प्रतियोगिताको दौरानमा हौसला एवं सहयोग गर्ने टोलीका अन्य व्यक्तिहरुलाई समेत सम्मान गरेको थियो ।
चितवन जिम हाउसका प्रबन्ध निर्देशक प्रकाश गुरुङको संयोजकत्वमा सम्पन्न सम्मान कार्यक्रममा चितवन जिम हाउसका प्रमुख सल्लाहकार राकेशमान श्रेष्ठले बिजेता रिक्की राई, टोलीमा सहभागी टिम म्यानेजर नवराज सुनार, सहयोगीहरु अमृत वि.क., रमेश बस्याल, किरण वि.क.ले जिम हाउसप्रति गर्नुभएको योगदानको प्रंशसा सहित कार्यक्रमको उद्देश्य माथि प्रकाश पार्नुभएको थियो ।
चितवन जिम हाउसका प्रेस सल्लाहकार राजु भट्टले सञ्चालन गर्नुभएको सम्मान कार्यक्रममा चितवन जिमका प्रबन्ध निर्देशक, संरक्षक, सल्लाहकारहरुले बिजेता सँगै सहयोगीहरुलाई अबिर र खादाले सम्मान गरेका थिए । सम्मान कार्यक्रममा चितवन जिम हाउसका संरक्षक लालबहादुर राय, सल्लाहकारहरु सूर्य हल्क, प्रदिप वाग्ले, प्रविन सिंह (पिन्टु), गैंडाकोट फुटवल संघका अध्यक्ष लक्ष्मण कार्की लगायतका जिमप्रेमीहरुको उपस्थिति रहेको थियो ।
