इच्छाकामना/वैदेशिक रोजगारीलाई व्यवस्थित र मर्यादित बनाउन इच्छाकामनामा संचालित सुरक्षित आप्रवासन परियोजना (सामीले) आज इच्छाकामनामा विभिन्न सरोकारवालहरुसंग अन्तरकृया कार्यक्रम गरेका छन् । स्थानीय जनप्रतिनिधि,पत्रकार र प्रहरीसंग अन्तरक्रिया कार्यक्रम सम्पन्न गरेको हो । परियोजनाको प्रमुख उद्देश्य वैदेशिक रोजगारीमा रहेका कामदार र कामदारका परिवारको उचित संरक्षण गर्ने, गन्तव्य मुलुकमा सुरक्षित र सम्मानजनक रुपमा काम गर्न सक्ने गरी कामदारलाई सूचना, सीप, परामर्श लगायतका सहयोग प्रदान गर्ने, वैदेशिक रोजगारीमा सम्वद्ध निकायहरुको क्षमता अभिवृद्धिमार्फत वैदेशिक रोजगारीका प्रतिफल वृद्धि गर्ने रहेको परियोजनाका प्रमुख सुर्यप्रसाद पौडेलले बताउनुभयो ।

चितवनका ७ स्थानीय तहमध्ये ४ स्थानीय तहमा उक्त परियोजना लागु गरिएको छ । भरतपुर महानगरपालिका, माडी नगरपालिका, रत्ननगर नगरपालिका, इच्छाकामना गाउँपालिकामा यो परियोजना संचालन छ । यस परियोजनाको मुख्य कार्यक्रमहरुमा सीपयुक्त जनशक्तिको विकास, सूचनामा पहुँच, न्यायमा पहुँच, मनोसामाजिक परामर्श, वित्तिय साक्षरता रहेका छन् हालसम्म ३९ जिल्लाका १५६ स्थानीय तहमा यो परियोजना लागु भएको छ । हेल्भेटास स्विस इन्टरको अपरेशन नेपालले परियोजनाका कार्यक्रम संचालनमा प्राविधिक सहयोग गरेको छ भने कार्यान्वयन साझेदारका रुपमा मेड–नेपालले कार्य गरिरहेको छ
गाउँपालिका अध्यक्ष गीता कुमारी गुरुङको अध्यक्षतामा कार्यक्रम सम्पन्न भएको हो ।