चितवन । मोफसलकै चर्चित लक्की मिडिया हाउसको गौरवमय पांँचौ बार्षिकोत्सवको अवसरमा विभिन्न क्षेत्रका व्यक्तित्वलाई सम्मानित गरिएको छ । सोमबार भरतपुरमा आयोजित शुभकामना तथा सम्मान कार्यक्रममा उनीहरु सम्मानित भएका हुन । मिडिया हाउसले विभिन्न विधा तथा क्षेत्रमा समाज रुपान्तरण र विकासमा भूमिका खेल्ने व्यक्तित्वलाई सम्मानित गरेको हो ।

सम्मानित हुनेमा चिकित्सा विधामा भरतपुर अस्पतालका मेडिसिन विभाग प्रमुख एवम् नेपाल चिकित्सक संघ चितवन शाखाका निवर्तमान अध्यक्ष डाक्टर प्रकाश खतिवडा, पुरानो मेडिकल कलेजका वरिष्ठ युरोलोजिष्ट डाक्टर सुदिपराज केसी र भरतपुर अस्पतालका वरिष्ठ बालरोग विशेषज्ञ डाक्टर ओमकृष्ण पाठक रहेका छन । शिक्षाकर्मी सम्मान अन्र्तगत ग्रीनल्याण्ड पब्लिक स्कुलकी प्राचार्य एवं मेट्रो प्याव्सनका उपाध्यक्ष इन्दिरा कार्की , लिटिल फ्लावर स्कुल, नारायणगढका प्राचार्य फादर रोवी र अर्किड स्कुल, भरतपुरका सह प्राचार्य ओमराज मैनालीलाई सम्मानित गरिएको छ ।

यस्तै बार्षिकोत्सव अवसरमा सम्मानित हुनेहरुमा नेपाली सिने क्षेत्रकी नायिका आंँचल शर्मा र अभिनेता विपिन कार्की रहेका छन । खेल विधा अन्तर्गत नवलपुर र चितवनका गरी तीन खेलाडी सम्मानित भएका छन । नवलपरासी – वर्दघाट सुस्तापूर्व जिल्ला फुटवलका संघका महासचिव लक्ष्मण कार्की, एएफसी फुटवल संघका प्रशिक्षक कृष्ण कार्की र ए डिभिजनका फुटबल खेलाडी प्रदिप भण्डारीलाई सम्मान गरिएको हो ।

यस्तै सो अवसरमा चितवनका दुई पत्रकारलाई पनि सम्मान गरिएको छ । सम्मानित हुनेहरुमा चितवनमा रहेर राष्ट्रिय तथा स्थानीय स्तरका सञ्चारमाध्यमा क्रियाशील पत्रकार सूर्यप्रसाद अधिकारी र चितवनमा दुई दशकभन्दा बढी रेडियो पत्रकारिता गरेका दिनेश श्रेष्ठ “पासा” रहेका छन ।

यस्तै मिडिया हाउसले चितवनका व्यवसायी क्षेत्रका व्यत्तित्वलाई समेत सम्मान गरेको छ । सुजन प्लानिङ्ग एण्ड कन्ट्रक्सन प्रा.लिका अध्यक्ष युवा व्यवसायी सुजन ओझा, सफल सर्जिकल हाउसका सञ्चालक अर्जुन रानाभाट र लेक ट्वान्टी थाउजेण्ड एण्ड रिट्रिका प्रबन्धक राजेश शर्मा आचार्य सम्मानित भएका हुन । सो अवसरमा देवघाट क्षेत्र विकास समितिका पूर्व अध्यक्ष एवं समाजसेवी टंकनाथ पौडेललाई समेत सम्मान गरिएको छ् । यस्तै मिडिया हाउसले उत्कृष्ट कार्य गरेको भन्दै मिडिया हाउसकी बजार प्रमुख विमला पौडेल बस्नेतलाई समेत नगदसहित पुरस्कृत गरेको थियो ।

सम्मानित व्यक्तित्वहरुलाई कार्यक्रमका प्रमुख अतिथि पूर्व स्वास्थ्य मन्त्री तथा नेपाली कांँग्रेसका केन्द्रीय सदस्य गगन थापा, विशिष्ट अतिथि वरिष्ठ कलाकार नीर शाह र लक्की मिडिया हाउसका महाप्रबन्धक हरि कार्की “लक्की” ले सम्मानपत्र सहित दोसल्ला ओडाएर सम्मान गरेका थिए ।

सो अवसरमा बोल्दै लक्की मिडिया हाउसका महाप्रबन्धक हरि कार्की “लक्की”ले कोरोनाले सम्पूर्ण क्षेत्र अस्तव्यस्त बनाएको बेला पाँचौ बार्षिकोत्सवको अवसरमा समाजका विभिन्न क्षेत्रका व्यत्तित्वहरुलाई सम्मान गर्न पाउंँदा आफू अत्यन्त खुशी भएको बताए । ‘ कोरोनाले सम्पूर्ण क्षेत्र अस्तव्यस्त र धराशायी छ , कार्कीले भने, सम्मानले उहांँहरुलाई केही उत्साह र उर्जा मिल्ने हाम्रो विश्वास छ । ’

कार्यक्रममा नेपाली कांँग्रेस चितवनका सभापति जीतनारायण श्रेष्ठ, भरतपुर अस्पताल विकास समितिका अध्यक्ष डाक्टर भोजराज अधिकारी, काँग्रेसका युवा नेता राजकुमार राजभण्डारी , नेपाल चलचित्र कलाकार संघका महासचिव चेतबहादुर सिंह ‘राजा’ लगायत उद्योगी व्यवसायी, नेता तथा कार्यकर्ताको सहभागिता रहेको थियो । सो अवसरमा साहित्यकार झमक घिमिरे लिखिति नेपाली कथानक चलचित्र ‘जीवन काँडा की फूल’ प्रर्दशन गरिएको थियो ।