भरतपुर/चितवनको प्रसिद्ध धार्मिक पर्यटकीय स्थल देवघाटमा कन्या गुरुकुल निर्माण तथा सञ्चालनको लागि शिवशक्ति कल्याणी केन्द्र, भरतपुरको आयोजनामा मंसिर १३ गतेदेखि भरतपुरमा शुरु हुन लागेको धनधान्याञ्जल एवं सप्ताह ज्ञान महायज्ञको तयारी अन्तिम चरणमा पुगेको छ ।
पछिल्लो समय धर्म र संस्कृति हराउंँदै र हस्तक्षेप भईरहेको भन्दै गुरुकुल शिक्षा मार्फत यसको संरक्षण र जगेर्ना गर्ने उद्देश्यले महायज्ञको आयोजना गर्न लागिएको महायज्ञ मुल समारोह समितिका संयोजक रविन्द्र अधिकारीले बताउनु भयो । उहांँका अनुसार नेपालका सबै वर्ग समुदाय, सम्प्रदायका नारीहरुलाई समेट्ने गरी गुरुकुल शिक्षा दिन लागिएको हो ।
सम्पूर्ण निर्माण सम्पन्न गर्न करीब २० करोड लागत अनुमान गरिएको सो गुरुकुलमा पहिलो चरणमा ६ कक्षादेखि शिक्षा आरम्भ हुने प्रचार प्रसार सयोजक सुर्य बहादुर कार्कीले बताउनु भयो । १२ रोपनी क्षेत्रफलमा फैलिएको गुरुकुलमा आवास सहितको व्यवस्था, पुस्तकालय, सभाहल लगायतका संरचना निर्माण गर्ने बताइएको छ ।
महायज्ञको तयारीका लागि विभिन्न समिति उपसमिति गठन गरी काम गर्ने संयोजक अधिकारीले जानकारी दिए । देवघाटमा हाल २ वटा कन्या गुरुकुल विद्यालय मार्फत पठनपाठन भईरहेको छ । मंसीर २१ गतेसम्म चल्ने महायज्ञ भरतपुर महानगरपालिका वडा नम्बर १२ स्थित पोखरेली टोलमा सञ्चालन हुनेछ ।
