चितवन/भरतपुर महानगरपालिकादारा सञ्चालित कोभिड १९ आइसोलेसन केन्द्र तथा यहाँको उपचार विधिको सफलताको चर्चा परिचर्चा देशभर बढ्दै जाँदा स्वास्थ्य मन्त्री भानुभक्त ढकाल समेत यहाँ आइपुग्नु भएको छ । भरतपुर १ बागीश्वरी स्थित योगी नरहरिनाथ योग तथा प्राकृतिक चिकित्सालयमा भरतपुर महानगरपालिकाले गत भदौ १४ गतेबाट सञ्चालनमा ल्याएको आइसोलेसन सेन्टरमा हालसम्म ३७८ जना कोरोना संक्रमित भर्ना भएकामा ३६१ जना निको भएर घर गइसकेका छन् । पछिल्लो समय भर्ना भएका १७ जना मात्रै अहिले उपचाररत छन् । योग, ध्यान, जडीबुटी एवम् प्राकृतिक आहारविहार र उपवासका माध्यमबाट यहाँ कोरोना संक्रमितहरुको सफल उपचार भइरहेको र अहिलेसम्म एकजनालाई पनि अन्त रिफर गरेर पठाउन नपरेको चिकित्सालयले बताउँदै आएको छ ।
यही मंसिर १६ गते मंगलबार स्वास्थ्यमन्त्री भानुभक्त ढकालले यहाँको स्थलगत निरीक्षण गरेका हुन् । प्राकृतिक हिसाबले उपयुक्त ठाउँमा यो आइसोलेसन केन्द्र रहेको भन्दै मन्त्री ढकालले कोरोनाको ओखती विश्वमै पत्ता लागिनसकेको अवस्थामा योग तथा प्राकृतिक चिकित्सा अत्यन्त उपयोगी देखिएको बताउनुभयो । अगाडि एउटा घेरामा रहेका संक्रमितहरुलाई हेर्दै उहाँले भन्नुभयो, “बिरामी अनुहार कसैको देखिँदैन।” बिरामीहरुलाई यो खालको वातावरणको लागि सरकारको तर्फबाट सदैव साथ र सहयोग रहिरहने उहाँ बताउनु हुन्छ । यस्ता आइसोलेसन सेन्टरहरुमा बिरामीलाई खान, बस्न र डाक्टरहरुका लागि प्रतिव्यक्ति प्रतिदिन दुई हजार रुपैयाँ खर्च सरकारले व्यवस्था गरेको उहाँले बताउनुभयो । कोरोनाको भ्याक्सिन अरु देशका जनताले लगाउँदा नेपालीले पनि लगाउन पाउने व्यवस्था मिलाउन सरकार लागिपरेको समेत मन्त्री ढकालले बताउनु भएको छ । सो अवसरमा आइसोलेसन सेन्टरको तर्फबाट मेयर रेनु दाहालले मन्त्री ढकाललाई मायाको चिनो स्वरुप गुर्जाेको बिरुवा प्रदान गर्नु भयो ।
प्रदेश सांसद विजय सुवेदी, नगर प्रमुख रेनु दाहाल, महानगरका प्रवक्ता एवम् सो आइसोलेसन सेन्टर संयोजक अरुणपीडित भण्डारी, महानगरका प्रेस सल्लाहकार सुरेशचन्द्र अधिकारी, महानगरका विपद् व्यवस्थापन शाखा प्रमुख जीवलाल कुँवर, नेकपा नगर अध्यक्ष रामप्रसाद न्यौपाने लगायत पनि मन्त्री उपस्थितिको उक्त अवसरमा आइसोलेसन सेन्टर आएका थिए । बिरामीहरुको बिदाइ होस् या अरुबेला पनि आफू यहाँ आइरहने बताउँदै मेयर रेनुले यहाँ स्वास्थ्यकर्मीहरुले १८ घण्टा खटिएर सेवा दिइरहेको बताउनुभयो । उहाँले भन्नुभयो, “सबै बिरामीहरु सन्तुष्ट हुनुहुन्छ, कसैले केही गुनासो गरेको सुनेको छैन।”
अहिले ९० जनाजतिको उपचार क्षमता यस केन्द्रको रहेको बताइन्छ । कोरोना संक्रमणको दर बढ्दै गएमा यहाँ एकैपटक २०० जना सम्मको उपचार गर्न सक्नेगरी व्यवस्था मिलाइने नगर प्रमुखले बताउनुभयो । यस आइलोसन सेन्टरको महत्व मनन् गरेर व्यस्तताको बाबजुद आउनुभएकोमा स्वास्थ्यमन्त्रीलाई मेयरले विशेष धन्यवाद दिनुभयो । यहाँको उपचार विधि कोरोना संक्रमितहरुका लागि रामवाण बनेको हुँदा यसलाई संसारकै नमूना आइसोलेसन सेन्टरको रुपमा लिन सकिने महानगरका आइसोलेसन संयोजक अरुणपीडित भण्डारी बताउनुहुन्छ ।
कोरोना परास्त गर्ने विधि, प्रविधिसहित नेपालभर कहीँ पनि कोभिडका कारण अप्रिय घटना हुन नदिन आफूहरुले प्रोटोकल तयार पारेको र फेरि छिट्टै स्वास्थ्यमन्त्रीलाई भेटेर यसबारे कुरा राखिने चिकित्सालयका निर्देशक डा. हेमराज कोइरालाले बताउनुभएको छ । अहिले यहाँ बिरामीलाई राखेर उपचार गरिने घरहरु धेरै वर्ष पुरानो भएको, भान्सा तथा बाटोहरु पनि मर्मत गर्नुपर्ने अवस्था रहेकोबारे समेत उहाँले मन्त्रीको ध्यानाकर्षण गराउनुभयो ।