भरतपुर/शुक्रबारदेखी चितवन उद्योग
संघको प्रदर्शनी केन्द्रमा हुने चौथो राष्ट्रिय कृषि यान्त्रीकरणको उद्घाटन पूर्व प्रधानमन्त्री एवं नेपाल कम्युनिष्ट पार्टीका अध्यक्ष पुष्पकमल दाहाल (प्रचण्ड) ले गर्दै हुनुहुन्छ ।
कृषि तथा पशुपन्छी विकास मन्त्रालय, प्रधानमन्त्री कृषि आधुनिकीकरण परियोजना, प्रदेश ३ भूमि व्यवस्था कृषि तथा सहकारी मन्त्रालय र नेपाल कृषि मेशिनरी व्यवसायी संघको संयुक्त आयोजनामा हुने प्रदर्शनी मंसिर ४ गतेदेखि ९ गतेसम्म चल्नेछ । २० भन्दा बढी मुलुकका २ हजार बढी किसिमका आधुनिक कृषियन्त्र, औजार, उपकरण तथा प्रविधिहरू राखिने आयोजकले जनाएको छ ।
कृषि सम्बन्धि आधुनिक प्रविधि, विभिन्न कृषि औजार, उपकरण, यन्त्रहरु तथा सेवाहरुको बारेमा जानकारी गराउने उद्देश्यले प्रदर्शनी आयोजना गर्न लागिएको नेपाल कृषि मेशिनरी व्यवसायी संघको अध्यक्ष स्वयम्भु कृष्ण श्रेष्ठले जानकारी दिनुभयो ।
देशभरबाट करिब ३५ हजार कृषकहरुले अवलोकन गर्ने तीन दिनको प्रदर्शनीमा १० करोडको आर्थिक कारोबार हुने अनुमान गरिएको छ । प्रदर्शनीमा निःशुल्क अवलोकनको व्यवस्था गरिएको आयोजकले जनाएको छ ।
