नारायणगढ–हेटौंडा सडक विस्तारलाई ठेक्का यही भदौ १९ गते आह्वान भएको छ । हेटौंडाको राप्ती पुलबाट चितवन भरतपुरको गोन्द्राङसम्म ७० किलोमिटरमा सडक स्तरोन्नति गर्ने गरी ठेक्का खुलाइएको हो । नारायणगढ–हेटौंडा सडक खण्डको ७० किलोमिटर विस्तारका लागि तीन प्याकेजमा ठेक्का आह्वान गरिएको छ। मकवानपुरदेखि भरतपुरको गोन्द्राङसम्म चार लेन सडक, पुल तथा सहरी क्षेत्रमा सर्भिस लेन निर्माण गरिनेछ।
चितवनको टिकौली जंगलमा वन्यजन्तुको आवागमनलाई ध्यानमा राख्दै दुई किलोमिटर लामो फ्लाइओभर बनाइनेछ, जसमा एडीबीको अनुदान र सहुलियतपूर्ण ऋण उपयोग हुनेछ
मकवानपुरदेखि चितवनको टिकौलीसम्मको २६ किमिलाई दोस्रो र टिकौलीदेखि गोन्द्राङसम्मको चार किमिलाई तेस्रो प्याकेजमा राखिएको छ । चितवनको टिकौली जंगलमा भने दुई किमि लामो फ्लाइओभर निर्माण गरिनेछ । यति लामो फ्लाइओभर पहिलो पटक संरक्षित क्षेत्रभित्र निर्माण गर्न लागिएको सडक आयोजना निर्देशनालय (एडीबी) का आयोजना निर्देशक चूडाराज ढकालले बताए । वन्यजन्तुलाई ध्यानमा राखेर फ्लाइओभर निर्माण गर्न लागिएको हो ।
समग्रमा मकवानपुरदेखि चितवनसम्म सात पक्की पुल निर्माण गरिनेछ । एसियाली विकास बैंक (एडीबी) को सहुलियतपूर्ण ऋणमा सडकको स्तरोन्नति गर्न लागिएको हो । फ्लाइओभर निर्माणमा साढे ५ अर्ब रुपैयाँ लाग्ने अनुमान छ । यसमा ३ अर्ब रुपैयाँ एडीबीको अनुदान छ । बाँकी रकम एडीबीकै सहुलियतपूर्ण ऋण रकमबाट खर्च गरिने आयोजनाले जनाएको छ । फ्लाइओभरको दुवैतर्फ एक–एक लेन यात्रुलाई हिँड्न र साइकल चलाउन मिल्ने बनाइने आयोजनाको भनाइ छ । बाँकी चार लेनमध्ये दुई–दुई लेनमा दुवैतर्फ सवारी ओहोरदोहोर गर्नेछन् ।
Advertisement
