चितवन/आफ्नै १९ वर्षीया छोरीलाई धम्की दिई जबरजस्ती करणी गरेको आरोपमा चितवन प्रहरीले भरतपुरका ४५ वर्षीय एक पुरुषलाई पक्राउ गरेको छ।
जिल्ला प्रहरी कार्यालय चितवनका निमित्त सूचना अधिकारी प्रहरी निरीक्षक मनिष श्रेष्ठका अनुसार पीडित छोरी स्वयं प्रहरी कार्यालयमा पुगेर बाबुविरुद्ध जबरजस्ती करणीको निवेदन दिएकी थिइन्। प्रहरीका अनुसार पक्राउ परेका पुरुषले बयानका क्रममा छोरीमाथि जबरजस्ती करणी गरेको स्वीकार गरेका छन्।
श्रीमती र छोरा जापानमा रहेका ती पुरुष करिब आठ महिनाअघि नेपाल आएका थिए। नेपालमा रहेकी छोरीको स्वास्थ्यमा समस्या आएपछि उपचारका लागि उनी नेपाल आएको प्रहरीले जनाएको छ। केही समयपछि जापान फर्किने तयारीमा रहेका उनको बयानबाट खुलेको प्रहरीले जनाएको छ।
प्रहरीका अनुसार बाबु–छोरी मात्रै घरमा बस्दै आएका थिए। गत साउन २८ गते रक्सी सेवन गरेका उनले धम्की दिई छोरीमाथि जबरजस्ती करणी गरेको निवेदनमा उल्लेख छ।
प्रहरीले भदौ ४ गते ती पुरुषलाई पक्राउ गरेको हो। अदालतबाट म्याद थप गरी घटनाबारे थप अनुसन्धान भइरहेको जिल्ला प्रहरी कार्यालय चितवनले जनाएको छ।
Advertisement
