मुलुकका प्रमुख भन्सार नाकामध्ये पर्ने लुम्बिनी प्रदेशका भन्सार कार्यालयले गत आर्थिक वर्ष २०८२/०८३ मा समग्र राजस्व संकलनमा सुधार गरेका छन् । तर, प्रदेशका साना भन्सार कार्यालयले वार्षिक राजस्व लक्ष्य पूरा गर्दा ठूलो राजस्व उठाउने प्रमुख भन्सार नाकाहरू भने निर्धारित लक्ष्य हासिल गर्न चुकेका छन् ।

लुम्बिनी प्रदेशमा मुलुककै दोस्रो ठूलो भैरहवा (बेलहिया) भन्सार, चौथो ठूलो नेपालगञ्ज भन्सार तथा पाँचौँ र छैटौँ ठूलो कृष्णनगर र सुठौली भन्सार सञ्चालनमा छन् । नेपालमा अहिले चल्तीका ४० वटा भन्सार कार्यालयमध्ये लुम्बिनी प्रदेशमा मात्रै आठवटा छन् ।

भैरहवा भन्सार कार्यालयले गत आवमा १ खर्ब ५ अर्बभन्दा बढी राजस्व संकलन गरेको छ । भन्सार कार्यालयका सूचना अधिकारी उद्धव ढुंगानाका अनुसार कार्यालयलाई १ खर्ब १३ अर्ब ६६ करोड ८१ लाख रुपैयाँ राजस्व संकलन गर्ने लक्ष्य दिइएको थियो । त्यसमध्ये ९२.४० प्रतिशत अर्थात् १ खर्ब ५ अर्ब २ करोड ४८ लाख ११ हजार रुपैयाँ राजस्व संकलन भएको हो ।

भैरहवा भन्सारले लक्ष्य पूरा गर्न नसके पनि अघिल्लो आव २०८१/०८२ को तुलनामा राजस्व असुलीमा उल्लेखनीय सुधार भने गरेको छ । अघिल्लो आवमा कार्यालयले वार्षिक लक्ष्यको ८७.०७ प्रतिशत मात्रै राजस्व संकलन गरेको थियो । यसले लक्ष्यप्राप्तिको अनुपातमा ५.३३ प्रतिशत बिन्दुले सुधार भएको देखाउँछ ।