वीरगन्ज । पर्साको सिर्सियामा रहेको सुख्खा बन्दरगाह भन्सार कार्यालयको इतिहास मेटेर सरकारले वीरगन्ज भन्सारमा नै गाभेपछि यो भन्सार कार्यालयले पहिलो वर्ष कुल २ खर्ब ४३ अर्ब ९६ करोड ४५ लाख ८४ हजार राजश्व संकलन गरेको छ । मुलुकको प्रमुख भन्सार नाकालाई विभागले दिएको लक्ष्यको तुलनामा ८९ दशमलब २४ प्रतिशत प्रगति देखिएको हो ।
साविकका दुई ठूला भन्सार गाभेपछि पनि विभागले अघिल्लो वर्षको तुलनामा गत आर्थिक वर्षका लागि ५ अर्ब ६१ करोड ४ लाख १२ हजार सिलिङ भने घटाएर लक्ष्य निधारण गरेको पाइएको छ । यो भनेको आर्थिक वर्ष (आब) ०८२–८३ का लागि विभागले वीरगन्ज भन्सार कार्यालयलाई २ खर्ब ७३ अर्ब ३९ करोड ४७ लाख ९५ हजार मात्र लक्ष्य दिएको हो । जबकी अघिल्लो आर्थिक वर्ष यही भन्सारलाई कुल २ खर्ब ७९ अर्ब ५२ लाख ७ हजार लक्ष्य दिएको कार्यालयको तथ्याँकमा नै उल्लेख गरिएको छ ।
नेपालको पहिलो ड्राइपोट (सुख्खा बन्दरगाह) भन्सार कार्यालयको अलग्गै अस्तित्व नरहने गरी सरकारी निर्णयसँगै ०८२ साउनदेखि साविकको सुख्खा बन्दरगाह भन्सार कार्यालय, वीरगन्ज भन्सार कार्यालयको एउटा महाशाखाका रुपमा कायम छ । यसले पनि संकलित गरेको राजश्व समेत गरी वीरगन्ज भन्सारको गत आ.ब.कुल २ खर्ब ४३ अर्ब ९६ करोड ४५ लाख ८४ हजार राजश्व संकलन भएको वीरगन्ज भन्सार कार्यालयका प्रमुख कृष्ण प्रसाद मैनालीले बताए । यो भनेको लक्ष्यको तुलनामा १० दशमलब ७६ प्रतिशतमात्र कम भएको उनको भनाइ छ ।
साविकका दुईवटा भन्सार कार्यालय एकै ठाउँमा गाभिएपछि वीरगन्ज भन्सार कार्यालयले ०८१–०८२ मा संकलन गरेको राजश्वभन्दा गएको आर्थिक वर्ष १८ अर्ब २२ करोड ९६ लाख ५३ हजार बढि राजश्व उठेको तथ्याँकमा उल्लेख छ । ०८१–०८२ मा भने वीरगन्ज भन्सार कार्यालयले २ खर्ब २५ अर्ब ७३ करोड ४९ लाख ३१ हजार राजश्व संकलन गरेको भन्सार कार्यालयले जनाएको छ ।
वीरगन्ज भन्सार कार्यालय एक्लैले ०७८–०७९ मा संकलन गरेको राजश्वको तुलनामा पछिल्ला केही वर्ष राजश्व संकलनको प्रगतिमा केही गिरावट आएको देखिएको छ । अर्थात ०७८–०७९ मा यो भन्सारले २ खर्ब ४ अर्ब १२ करोड २७ लाख ५७ हजार राजश्व संकलन गरेको वीरगन्ज भन्सारसँगै तथ्याँक छ । सो आर्थिक वर्षका लागि विभागले वीरगन्ज भन्सारलाई कुल २ खर्ब, ३ अर्ब २ करोड ५० लाख ३७ हजार लक्ष्य तोकेको थियो । जसमा भन्सारको प्रगति १०० दशमलब ५४ प्रतिशत थियो ।
तर ०७९–०८० र ०८०–०८१ का आर्थिक वर्षमा भने ०७८–०७९ को जति पनि राजश्व संकलनको प्रगति देखिएको छैन । वीरगन्ज भन्सारको राजश्व लक्ष्य ०७९–०८० र ०८०–०८१ क्रमशः २ खर्ब ६० अर्ब ९७ करोड २ लाख ८ हजार र २ खर्ब ४५ अर्ब ८८ करोड ५० लाख ८१ हजार थियो । तथापि भन्सारले सो दुबै आर्थिक वर्ष भने क्रमशः १ खर्ब ५७ अर्ब १५ करोड ४९ लाख २१ हजार र १ खर्ब ५७ अर्ब ४० करोड २९ लाख ६६ हजार मात्र राजश्व संकलन गरेको उसैको तथ्याँकले प्रष्ट पारेको छ ।
यता ०८१–८२ र ०८२–८३ मा भने यति लज्जास्पद अलि नरहेको वीरगन्ज भन्सारको तथ्याँकले प्रष्ट्याएको छ ।
उता सुख्खा बन्दरगाह भन्सार कार्यालय अलग अस्तित्वमा रहँदा यो भन्सारले ०८१–८२ मा कुल ४९ अर्ब ६६ करोड ४८ लाख ६६ हजार राजश्व संकलन गरेको साविकको तथ्याँक छँदैछ । सो समयमा विभागले ६० अर्ब ४ करोड ८७ लाख ९७ हजार लक्ष्य सुख्खा बन्दरगाहलाई विभागले दिएको थियो । अहिले भने दुबै ठूला भन्सार एक ठाउँमा गाभिदा राजश्व लक्ष्यको सिलिङ र राजश्वको प्रगति अझ उच्च हुनुपर्ने स्थानीय करदाताहरुको तर्क छ । साथै लक्ष्य अनुसार करको दर कम गरी दायरा फराकिलो पार्न पनि उनीहरुको सुझाव छ ।
