काठमाडौं/नेपाल राष्ट्र बैंकले बैंकिङ प्रणालीमा रहेको अधिक तरलता व्यवस्थापन गर्ने उद्देश्यले १५ अर्ब रुपैयाँ बराबरको ‘नेपाल राष्ट्र बैंक ऋणपत्र २०८४–६’ जारी गर्ने भएको छ । केन्द्रीय बैंकले सोमबार (असार २९) उक्त ऋणपत्र निष्कासन गर्न लागेको हो । ऋणपत्र खरिदका लागि इच्छुक योग्य संस्थाले आज दिउँसो ३स्०० बजेसम्म अनलाइन बिडिङ प्रणालीमार्फत मात्र बोलपत्र पेस गर्न सक्ने व्यवस्था गरिएको राष्ट्र बैंकले जनाएको छ ।

राष्ट्र बैंकका अनुसार ऋणपत्रको ब्याजदर बोलकबोल प्रक्रियाबाट निर्धारण हुनेछ । सहभागी संस्थाहरूले बहुब्याजदरमा समेत बोलकबोल गर्न सक्ने सुविधा पाउनेछन् ।

यस ऋणपत्रको बोलकबोलमा नेपाल राष्ट्र बैंकबाट इजाजत प्राप्त ‘क’, ‘ख’ र ‘ग’ वर्गका बैंक तथा वित्तीय संस्थाहरू मात्र सहभागी हुन पाउनेछन् । उनीहरूले न्यूनतम ५ करोड रुपैयाँदेखि कुल आह्वान रकमसम्म, ५ करोड रुपैयाँले भाग गर्दा निःशेष भाग जाने गरी बोलपत्र पेस गर्न सक्नेछन् ।

राष्ट्र बैंकले बोलकबोलबाट प्राप्त ब्याजदरलाई सानोदेखि ठूलो क्रममा राखी आह्वान गरिएको रकमसम्म कायम हुने दरलाई एकल ब्याजदरका रूपमा निर्धारण गर्ने जनाएको छ । सोही वा सोभन्दा कम ब्याजदरमा बोल गर्ने संस्थाहरूलाई ऋणपत्र बिक्री गरिनेछ । समान ब्याजदरमा माग गरिएको रकम निष्कासित रकमभन्दा बढी भएमा समानुपातिक रूपमा बाँडफाँट गरिने व्यवस्था गरिएको छ ।

खुला बजार कारोबार सञ्चालन समितिलाई भने प्राप्त बोलपत्रमध्ये सम्पूर्ण वा आंशिक रकम स्वीकार वा अस्वीकार गर्ने अधिकार सुरक्षित रहने राष्ट्र बैंकले जनाएको छ । जारी गरिने यो एक वर्ष अवधिको ऋणपत्र हो । यसको साँवा आगामी असार २९ गते भुक्तानी गरिनेछ भने ब्याज अर्धवार्षिक रूपमा भुक्तानी गरिने व्यवस्था रहेको छ ।