काठमाडौं/नेपाल चेम्बर अफ कमर्स र बृहत ग्रुपको उद्यमशीलता तथा भेन्चर विकास पहल बृहतप्रेन्योर्स प्रालि बीच उद्यमशीलता विकास, नवप्रवर्तन, व्यवसाय विस्तार तथा लगानी प्रवद्र्धनका लागि दुई वर्षे समझदारीपत्रमा हस्ताक्षर भएको छ ।
समझदारीपत्रमा नेपाल चेम्बर अफ कमर्सको भौतिक पूर्वाधार तथा भूमि सुधार समितिका सभापति रोशन भोयाद्यो तथा बृहतप्रेन्योर्सका संस्थापक एवं बृहत ग्रुपका संस्थापक तथा प्रमुख कार्यकारी अधिकृत डेडेन लामा राजभण्डारीले हस्ताक्षर गर्नुभएको हो ।
सम्झौताअनुसार दुवै संस्थाले देशभर उद्यमशीलता प्रवद्र्धन, स्टार्टअप तथा नवउद्यमको विकास, व्यवसायिक सञ्जाल विस्तार, मेन्टोरसिप, क्षमता अभिवृद्धि तथा लगानीका अवसर सिर्जना गर्न संयुक्त कार्यक्रम सञ्चालन गर्नेछन् । नेपाल चेम्बर अफ कमर्सले देशका पाँच स्थानमा उद्यमी तथा व्यवसायीलाई लक्षित जनचेतना र पहुँच विस्तार कार्यक्रम सञ्चालन गर्नेछ भने नवौं नेपाल ल्यान्ड, हाउजिङ एन्ड कन्स्ट्रक्सन एक्स्पोका अवसरमा विशेष उद्यमशीलता कार्यक्रम पनि आयोजना गरिनेछ ।
बृहतप्रेन्योर्सले सहभागी उद्यमीहरूका लागि अभिमुखीकरण, व्यवसाय विकास तालिम, बिजनेस क्लिनिक, इन्क्युबेसन, मेन्टोरसिप, नेटवर्किङ तथा भेन्चर सपोर्ट कार्यक्रम सञ्चालन गर्नेछ । साथै सदस्यता, साझेदारी, को–वर्किङ सुविधा तथा व्यवसाय विस्तारका अवसर उपलब्ध गराइने जनाइएको छ ।
सम्झौताअनुसार दुई वर्षको अवधिमा कम्तीमा छ वटा उद्यमशीलता तथा नेटवर्किङ कार्यक्रम आयोजना गरी तीन सयभन्दा बढी उद्यमी, स्टार्टअप तथा व्यवसायीलाई सहभागी गराउने लक्ष्य राखिएको छ । संझौतामा नेपाल चेम्बर अफ कमर्सको युवा समिति समेतको सहकार्य रहने उल्लेख छ ।
कार्यक्रममा नेपाल चेम्बर अफ कमर्सका अध्यक्ष कमलेश कुमार अग्रवालले यस सहकार्यले उद्यमशीलता विकास, लगानी प्रवद्र्धन तथा निजी क्षेत्रको सशक्तीकरणमा महत्वपूर्ण योगदान पुग्ने विश्वास व्यक्त गर्नुभयो । उहाँले उद्यमी, नवप्रवर्तक, स्टार्टअप र लगानीकर्तालाई एउटै साझा मञ्चमा जोड्ने बृहतप्रेन्योर्सको पहल समयानुकूल रहेको उल्लेख गर्दै निजी क्षेत्रबीचको सहकार्यबाट रोजगारी सिर्जना, नवप्रवर्तन र आर्थिक गतिविधि थप सशक्त बन्ने बताउनुभयो ।

कार्यक्रममा बृहतप्रेन्योर्सका संस्थापक एवं बृहत ग्रुपका कार्यकारी अध्यक्ष डा. ओम राजभण्डारी ले नेपालमा उद्यमशीलताको नयाँ संस्कृतिको विकासका लागि “आइडिया मात्र होइन, कार्यान्वयन“ मा जोड दिनुपर्ने बताउनुभयो । राजभण्डारीले बृहतप्रेन्योर्सलाई उद्यमी, विशेषज्ञ, व्यवसाय र लगानीकर्तालाई जोड्ने भेन्चर–बिल्डिङ इकोसिस्टम का रूपमा विकास गरिएको उल्लेख गर्दै सहकार्य, संरचना, मार्गदर्शन र साझा स्रोतमार्फत दिगो तथा विस्तारयोग्य व्यवसाय निर्माणमा संस्थाले योगदान पु¥याउने विश्वास व्यक्त गर्नुभयो । कार्यक्रममा नेपाल चेम्बर अफ कमर्सका उपाध्यक्ष दिपक श्रेष्ठ, नेपाल चेम्बर अफ कमर्सका युवा समिति सभापति दिपेशरत्न तुलाधर लगायतको उपस्थिती रहेको थियो ।