रत्ननगर/नेकपा (एकीकृत समाजवादी) चितवनका जिल्ला कमिटी सदस्य तथा रत्ननगर नगरपालिका–१५ का सक्रिय नेता विष्णु प्रसाद लम्सालले पार्टी परित्याग गरी राष्ट्रिय स्वतन्त्र पार्टी (रास्वपा) मा प्रवेश गरेका छन्। सोमबार सामाजिक सञ्जाल फेसबुकमार्फत सार्वजनिक घोषणा गर्दै लम्सालले आफूले आजकै मितिदेखि बाँकी राजनीतिक जीवन देश निर्माणका लागि समर्पित गर्ने निर्णयसहित रास्वपामा समाहित भएको जानकारी दिएका हुन्।

उनले आफ्नो फेसबुक स्टाटसमार्फत विगत केही वर्षदेखि आफूले आत्ममूल्याङ्कन गर्दै आएको उल्लेख गर्दै वर्तमान राजनीतिक परिस्थितिमा नयाँ विकल्प रोज्ने निर्णय गरेको बताएका छन्। उनले अब देशमा सुशासन, पारदर्शिता र जनउत्तरदायी राजनीति स्थापना गर्ने उद्देश्यका साथ रास्वपामा आबद्ध भएको जनाएका छन्।

लम्सालले पुराना राजनीतिक सहकर्मीहरूसँगको सम्बन्ध यथावत् रहने विश्वास व्यक्त गर्दै नयाँ राजनीतिक यात्रामा साथ, सहयोग र विश्वासको अपेक्षा पनि गरेका छन्।

वि.सं. २०७९ सालदेखि नेकपा (एकीकृत समाजवादी) मा सक्रिय रहेका लम्साल जनमुखी कार्यशैलीका कारण स्थानीयस्तरमा परिचित नेताका रूपमा चिनिन्छन्। उनी रत्ननगर नगरपालिका–१५ स्थित छहारी टोल विकास संस्थाका अध्यक्षसमेत हुन्। उक्त संस्थाको नेतृत्व उनी लगातार तेस्रो कार्यकालदेखि सम्हालिरहेका छन्।

रास्वपामा प्रवेशपछि लम्सालले वर्तमान राजनीतिक अवस्थाले वैकल्पिक राजनीतिक शक्तिको आवश्यकता अझ बढाएको उल्लेख गर्दै सुशासन, पारदर्शिता र जनउत्तरदायी शासन प्रणालीका लागि राष्ट्रिय स्वतन्त्र पार्टी उपयुक्त विकल्प भएको धारणा व्यक्त गरेका छन्।

लम्सालको रास्वपा प्रवेशलाई रत्ननगर–१५ को स्थानीय राजनीतिमा महत्त्वपूर्ण राजनीतिक घटनाका रूपमा हेरिएको छ।
लम्साल सँगै रत्ननगरमा दुई दर्जन बढिले समाजवादी पार्टी परित्याग गर्दै रास्वपामा प्रवेश गर्ने तयारी गरेका जानकारी प्राप्त भएको छ।