चितवन/चितवनको रत्ननगरमा माध्यमिक तहका गणित शिक्षकहरूका लागि सञ्चालन गरिएको तीनदिने ‘२१औँ शताब्दीको सिकाइका लागि सबल गणित शिक्षण’ विषयक शिक्षक पेसागत विकास तालिम शनिबार सम्पन्न भएको छ।
Advertisement
रत्ननगर नगरपालिका र काठमाडौँ विश्वविद्यालय स्कुल अफ एजुकेशन (केयूएसओईडी) को संयुक्त आयोजना तथा प्रायोजनमा असार ५, ६ र ७ गतेसम्म रत्ननगर-१०स्थित श्री बैरिया माध्यमिक विद्यालयमा सञ्चालन गरिएको तालिममा ३० जना गणित शिक्षकको सहभागिता रहेको थियो।
बैरिया माध्यमिक विद्यालय व्यवस्थापन समितिका अध्यक्ष रमेशप्रसाद न्यौपानेको अध्यक्षता तथा रत्ननगर नगरपालिका शिक्षा शाखाकी अधिकृत नीता कट्टेलको प्रमुख आतिथ्यमा उक्त तालिमको समापन तथा प्रमाणपत्र वितरण समारोह सम्पन्न भएको थियो।
सो कार्यक्रममा काठमाडौँ विश्वविद्यालयका गोल्ड मेडलिस्ट तथा वरिष्ठ शिक्षाविद् डी.आर. सिम्खडाले विशेष सुपरिवेक्षण गर्नुभएको थियो भने कार्यक्रमको सञ्चालन श्री माधवपुर माध्यमिक विद्यालयका प्रधानाध्यापक रमेश भट्टले गर्नुभएको थियो।
कार्यक्रममा आयोजक र सहभागी शिक्षक–शिक्षिकाको तर्फबाट उत्कृष्ट व्यवस्थापकीय भूमिका निर्वाह गरेको भन्दै श्री बैरिया माध्यमिक विद्यालयलाई ‘मायाको चिनो’ प्रदान गरिएको थियो। तालिम अवधिभर भौतिक तथा व्यवस्थापकीय सहयोग पुर्याउने विद्यालयका प्रधानाध्यापक युवराज पौडेल तथा सहायक प्रधानाध्यापक कमल पाण्डेलाई विशेष धन्यवाद व्यक्त गरेका थिए।
यसैगरी, कार्यक्रमको पूर्वतयारीदेखि समापनसम्म निरन्तर समन्वय र सहयोग पुर्याएको भन्दै नेपाल माध्यमिक विद्यालयका गणित विषयका विज्ञ धर्मराज चालिसे र श्री पञ्चकन्या माध्यमिक विद्यालयका प्रधानाध्यापक तथा गणित विषयका विज्ञ रामहरि भण्डारीप्रति आयोजक टोली तथा सहभागीका तर्फबाट विशेष आभार व्यक्त गरिएको थियो।
तालिममा सक्रिय सहभागिता जनाउने शिक्षकहरूमध्ये कृष्णप्रसाद दल्लाकोटी ‘सर्वोत्कृष्ट ऊर्जावान् व्यक्तित्व’ र गोविन्द पौडेल ‘सर्वोत्कृष्ट प्रेरणादायी व्यक्तित्व’ पुरस्कारबाट सम्मानित भएका छन्।
तीन दिनसम्म दैनिक ६ घण्टाका दरले सञ्चालन गरिएको तालिममा काठमाडौँ विश्वविद्यालयका विज्ञ प्रशिक्षक विनोद श्रेष्ठ, विशाल अधिकारी र सन्तोष कुमार के.सी.ले कृत्रिम बुद्धिमत्ताको प्रयोगसहित गणित शिक्षण, बीजगणित र ज्यामिति, डेसमसमार्फत गणितीय बुझाइ अभिवृद्धि तथा कक्षाकोठा व्यवस्थापन, गेमिफिकेसन र ‘एरर अक्सन’ विधिजस्ता विषयमा प्रयोगात्मक सहजीकरण गर्नुभएको थियो।
तालिममा गणित शिक्षणमा कृत्रिम बुद्धिमत्ता (एआई), एआई प्रम्प्ट राइटिङ, प्रविधिमैत्री पाठ योजना निर्माण, ‘पोलिप्याड’ र ‘जियोजेब्रा’ जस्ता डिजिटल माध्यमको प्रयोग तथा ‘डेसमस’ ग्राफिङ टुलमार्फत वास्तविक जीवनसँग जोडिएका अभ्यासलाई प्राथमिकता दिइएको थियो। साथै, विद्यार्थीहरूमा गणितप्रतिको डर कम गर्न खेल–खेलमा सिकाइ, समूहगत सिकाइ र गल्तीलाई सिकाइको अवसरका रूपमा उपयोग गर्ने ‘एरर अक्सन’ विधिबारे अभ्यास गराइएको थियो।
समापन समारोहमा प्रमुख अतिथि नीता कट्टेल र सभापति रमेशप्रसाद न्यौपानेले शिक्षकहरूको निरन्तर क्षमता विकासबिना गुणस्तरीय शिक्षा सम्भव नहुने उल्लेख गर्दै तालिमबाट सिकेका एआई, सूचना तथा सञ्चार प्रविधि, गेमिफिकेसन तथा ‘एरर अक्सन’ जस्ता बालमैत्री विधिलाई कक्षाकोठाको व्यवहारमा उतार्न आग्रह गर्नुभयो।
स्थानीय सरकार र काठमाडौँ विश्वविद्यालयको संयुक्त प्रयासले रत्ननगर क्षेत्रको गणित शिक्षणलाई प्रविधिमैत्री, प्रभावकारी र विद्यार्थीमैत्री बनाउँदै गणितप्रतिको डर न्यूनीकरण गर्न महत्त्वपूर्ण योगदान पुग्ने अपेक्षा गरिएको छ।
