काठमाडौं/महिला सशक्तीकरणकी अनुसन्धानकर्ता सरिता ढकालले आफूलाई स्वतन्त्र नेपाली नागरिकको रूपमा परिचित गराउँदै प्रधानमन्त्री बालेन शाहप्रति सम्बोधन गरिएको एक खुला पत्र सार्वजनिक गरेकी छन्।
उक्त पत्रमा उनले आफू कुनै राजनीतिक दल, गुट वा विचारधाराको अन्धअनुयायी नभई राष्ट्रको हित, जनताको पक्ष र समृद्ध नेपालको पक्षमा उभिएको एक जिम्मेवार नागरिक भएको उल्लेख गरेकी छन्।
ढकालले देशले लामो समयदेखि भोग्दै आएको राजनीतिक अस्थिरता, भ्रष्टाचार, अवसरको अभाव, युवाहरूको पलायन तथा जनताका विविध पीडाप्रति चिन्ता व्यक्त गर्दै नेपाललाई सुशासित, आत्मनिर्भर र समृद्ध राष्ट्रका रूपमा हेर्ने आफ्नो चाहना व्यक्त गरेकी छन्।
उनले राष्ट्रिय स्वतन्त्र पार्टीको महाधिवेशनमा प्रधानमन्त्री शाहले व्यक्त गरेको दृष्टिकोण, राष्ट्रप्रतिको समर्पण र जनताप्रतिको जिम्मेवारीबोधले आफूलाई आशावादी बनाएको उल्लेख गरेकी छन्। ती अभिव्यक्तिहरूलाई उनले परिवर्तनको प्रतीक्षामा रहेका नेपाली जनताको आकाङ्क्षाको प्रतिबिम्बका रूपमा व्याख्या गरेकी छन्।
पत्रमा रामराज्यको अवधारणालाई न्यायपूर्ण शासन, जनताप्रतिको उत्तरदायित्व, भ्रष्टाचारमुक्त प्रशासन, कानुनको समान कार्यान्वयन तथा नागरिक सम्मानको प्रतीकका रूपमा उल्लेख गर्दै वर्तमान नेपाललाई पनि त्यस्तै सेवामुखी नेतृत्व आवश्यक रहेको धारणा राखिएको छ।
ढकालले देशका युवाहरू विदेशिन बाध्य नहुने वातावरण निर्माण गर्न, किसानलाई श्रमको उचित मूल्य दिलाउन, विद्यार्थीलाई स्वदेशमै अवसर उपलब्ध गराउन, महिलाको सुरक्षा र आत्मनिर्भरता सुनिश्चित गर्न तथा श्रमिकको सम्मान स्थापित गर्न नेतृत्वको ध्यानाकर्षण गराएकी छन्। साथै, राज्यका सबै संरचनामा पारदर्शिता, जवाफदेहिता र सुशासन कायम हुनुपर्नेमा जोड दिएकी छन्।
उनले नेपाललाई भाषणभन्दा बढी कार्यान्वयन, नाराभन्दा बढी परिणाम र आश्वासनभन्दा बढी इमानदार नेतृत्व आवश्यक रहेको उल्लेख गर्दै जनताले दिएको विश्वासलाई कर्ममार्फत् प्रमाणित गर्ने समय आएको बताएकी छन्।
पत्रको अन्त्यमा उनले नेपाललाई केवल भूगोल नभई पुर्खाहरूको त्याग, संघर्ष र बलिदानको विरासतको रूपमा चित्रण गर्दै समृद्ध, न्यायपूर्ण र गौरवशाली नेपाल निर्माण सबै नेपालीको साझा दायित्व भएको उल्लेख गरेकी छन्।
उनले आशा व्यक्त गरेकी छन् कि देशले अब निराशाको अध्याय होइन, सम्भावनाको इतिहास लेख्नेछ र नेपाल आमाको मुहारमा समृद्धि, शान्ति, न्याय र सुशासनको उज्यालो सधैँ झल्किरहनेछ।
– सरिता ढकालमहिला सशक्तीकरणकी अनुसन्धानकर्ता
