भरतपुर/चितवन उद्योग संघको आयोजनामा चितवन उद्योग संघले ३७ औं संघ दिवसको अवसरमा संघको भरतपुर महानगरपालिका वडा नं.२९, कविलासस्थित जुरेथुम्कामा रहेको प्रस्तावित औद्योगिक शिक्षालय परिसरमा वृक्षारोपण तथा शुभकामना आदान–प्रदान कार्यक्रम सम्पन्न भएको छ ।
चितवन उद्योग संघका अध्यक्ष मदन घिमिरेले स्वागत मन्तव्य सहित चितवन उद्योग संघको गतिविधिको संक्षिप्त प्रस्तुतिकरण गर्नुभएको कार्यक्रममा चितवन उद्योग संघ, गभर्निङ काउन्सिलका अध्यक्ष भेषराज दुवाडी प्रमुख अतिथि रहनु भएको थियो ।
प्रमुख अतिथि दुवाडीले संघले ३६ औं वसन्त पार गरी ३७ औं वसन्त पार गरिरहँदा संघमा हुने गतिविधिहरुले यसको उचाई बढाएको बताउनुभयो । दुवाडीले संघको नेतृत्व तहले विगतको अवस्थालाई समेत ध्यानमा राखी आफ्ना योजना तथा कार्यक्रमहरु अगाडि बढाउनु पर्ने बताउनुभयो ।
शुभकामना आदान प्रदान कार्यक्रममा पूर्व अध्यक्षहरुको प्रतिनिधित्व गर्दै चितवन उद्योग संघका पूर्व अध्यक्ष गुणाकर खरेल, पूर्व पदाधिकारीहरुको प्रतिनिधित्व गर्दै महिला उद्यमी मञ्चका पूर्व अध्यक्ष पवित्रा जोशी, संघका पालिका समितिहरुको प्रतिनिधित्व गर्दै राप्ती समितिका अध्यक्ष खिलप्रसाद घिमिरे, वस्तुगत समितिको प्रतिनिधित्व गर्दै चितवन मेटल इन्जिनियरिङ्ग एण्ड फेब्रिकेशन उद्योग समितिका अध्यक्ष मोहनलाल श्रेष्ठ, महिला उद्यमी मञ्चकी अध्यक्ष सरिता खनाल पौडेल, युवा उद्यमी मञ्चका अध्यक्ष भरत दवाडीले शुभकामना व्यक्त गर्नुभएको थियो ।
कार्यक्रममा चितवन उद्योग संघका पूर्व अध्यक्षहरु त्रिलोचन कँडेल, राजु पौडेल, हरि प्रसाद सुवेदी, सोमराज मरहट्टा, उपाध्यक्षहरु गजेन्द्र अधिकारी, तारा बहादुर कार्की, गोपाल प्रसाद गैरे, विशाल चापागाई, नेपाल पत्रकार महासंघ, चितवन शाखाका अध्यक्ष वसन्त पराजुली, कार्यसमिति सदस्यहरु, पालिका समितिका पदाधिकारी एवम् सदस्यहरु, वस्तुगत समितिका पदाधिकारी एवम् सदस्यहरु, महिला तथा युवा उद्यमी मञ्चका पदाधिकारी एवम् सदस्यहरु लगायतको उपस्थिति रहेको थियो । चितवन उद्योग संघका कार्यकारी निर्देशक गणेशप्रसाद सिलवालले सञ्चालन गर्नुभएको कार्यक्रमलाई चितवन उद्योग संघका उपाध्यक्ष एवम् संगठन विभागका विभागीय प्रमुख प्रमेश्वर भण्डारीले धन्यवाद मन्तव्य सहित कार्यक्रम समापन गर्नुभएको थियो ।