भरतपुर/आँपटारीस्थित योगी नरहरिनाथ आश्रम वागीश्वरीमा जारी कोटिहोम महायज्ञ अन्तर्गत कविता वाचन प्रतियोगिता बिहीबार सम्पन्न भएको छ । प्रतियोगितामा तनहुँका अंकित पाण्डे प्रथम भए । उनले नगद १० हजार रुपैयाँ प्राप्त गरे ।
प्रतियोगितामा दोस्रो भएका रत्ननगरका कबिर काफ्लेले नगद आठ हजार रुपैयाँ पाए भने तेस्रो भएकी झापाकी नविना भट्टराईले छ हजार रुपैयाँ जितिन् । सान्त्वना भएका सोलुखुम्बुका सुरक्षा भट्टराई र तनहुँका देवेन्द्र सापकोटाले चार/चार हजार रुपैयाँ प्राप्त गरे । प्रतियोगितामा २५ जना सहभागी भएका थिए ।
यो महायज्ञ नितान्त सात्विक यज्ञका रुपमा सञ्चालन भइरहेको छ । रकम तोकेर वा पत्र पठाएर आर्थिक सहयोग माग्न निषेध गरिएको यो महायज्ञमा भक्तजनले स्वतस्फुर्त रुपमा दान गर्ने गरेका छन् । बिहीबार नेपाली सेनाको नयाँ सबुज दल गण भरतपुरले महायज्ञलाई चरु लगायतका हवन सामाग्री सहयोग गरेको छ । हवन सामाग्री हस्तान्तरण गर्न गणका गणपति सुदीप तामाङ स्वयम महायज्ञ पुगेका थिए ।

महायज्ञमा अहिले बिजमन्त्रद्धारा नियमित हवन गर्नुका साथै अतिरुद्री महायज्ञ, गायत्री लक्ष हवन र सहस्र चण्डी पनि भइरहेको छ । गत वैशाख १७ गतेदेखि सुरु भएको श्रीशिवगोरक्ष–योगीनरहरिनाथ–साङ्ग–कोटिहोम महायज्ञ आगामी असार १३ गते सम्पन्न हुनेछ । महायज्ञ अन्तर्गत भजन प्रतियोगिता पनि भइरहेको छ । भजन प्रतियोगिताको फाइनल यहि जेठ ३० गते हुनेछ । महायज्ञमा आगामी असार ६ गते नौ वर्ष मुनिका एक हजार आठ बालिकाको सामुहिक पुजन गरिँदै छ । सामुहिक पुजनका लागि नौ वर्ष मुनिका बालिका र अभिभावकको नाम टिपाउने आयोजकले आग्रह गरेको छ । असार ८ गते पाँचसरे सवा करोड दीप प्रज्वलन गर्ने कार्यक्रम रहेको महायज्ञ संयोजक एवम् मुख्यकर्ता प्रेमनिधि भारद्वाजले जानकारी दिए । महायज्ञमा प्रमुख वाचक ज्योतिष पण्डित परशुराम पाण्डेयले दैनिक भागवत कथावाचन गरिरहेका छन् ।