भरतपुर÷चितवन उद्योग संघको आयोजनामा कोरिया गणतन्त्र कोरियाको ग्वाङ्जु महानगरपालिकाका लागि नेपालका संस्थापक मानार्थ महावाणिज्यदूत डा. सुङ ह्युन जियोनसँग भेटघाट तथा छलफल कार्यक्रम सम्पन्न गरेको छ ।
चितवन उद्योग संघका कार्यवाहक अध्यक्ष गजेन्द्र अधिकारीको अध्यक्षतामा सम्पन्न कार्यक्रममा नेपालका संस्थापक मानार्थ महावाणिज्यदूत डा. सुङ ह्युन जियोनले नेपालको २२ औं पटक भ्रमण गरिरहँदा यहाँको सामाजिक, भौतिक एवम् पर्यटकीय हिसाबले यहाँका जनताहरु हरेक किसिमले सम्पन्न रहेको बताउनुभयो । आफू उद्योगी नभई विशुद्ध डाक्टर भएको भएतापनि यहाँका उद्यमीहरुले उद्यमशिलतामा गरेको त्याग, सीप र लगानीलाई आफूले नजिकबाटै बुझ्न पाएको समेत बताउनुभयो । छलफलमा चितवनका उद्यमीहरुबाट कोरियासँग उद्यमशिलतासँग जोड्न सोधिएका उद्यमीहरुका प्रश्नहरुलाई नेपाली उद्यमी रुद्र शर्माले सहजीकरण गर्नुभएको थियो ।
छलफलमा चितवन उद्योग संघका पूर्व अध्यक्ष भेषराज दुवाडीले विगतमा भएको कोरियाको भ्रमणले आफूलाई पर्यटन उद्योगमा लाग्न प्रेरित गरेको र अब छिट्टै यस्ता खाले भ्रमणलाई पुर्नताजगी बनाउन आवश्यक रहेको बताउनुभयो ।
त्यस्तै चितवन उद्योग संघका पूर्व अध्यक्ष कृष्ण प्रसाद अधिकारीले चितवन उद्योग संघको परिसरमा निर्माण भएको चितवन प्रदर्शनी केन्द्रमा कोरियाको नवप्रवद्र्धन प्रविधि, सीप र ज्ञानलाई ल्याई प्रदर्शनी मार्फत सहकार्य गर्न आफूहरु तयार रहेको बताउनुभयो । त्यस्तै चितवन उद्योग संघका पूर्व अध्यक्ष हरि प्रसाद सुवेदीले चितवन उद्योग संघको विगतको वस्तुस्थिति र संस्थाले गतिविधिहरुको बारेमा प्रकाश पार्नुभएको थियो । त्यस्तै कार्यसमिति सदस्य अश्विन गोलेले कोरियन युवाहरुको उद्यमशिलता प्रतिको आकर्षण, पुस्ता हस्तान्तरण, प्रकाश पौडेलले ब्रिक उद्योगप्रति कोरिया कत्तिको अवसर लगायतका विषयमा सुझाव राख्नु भएको थियो ।
डा. सुङ ह्युन जियोनलाई सम्मान गरिएको कार्यक्रममा चितवन उद्योग संघका पूर्व अध्यक्ष तारा प्रसाद पौडेल, कायसमिति सदस्य शेषमणी भट्टराई, उद्यमी नारायण प्याकुरेल, प्रबिन अधिकारी, साकोस व्यवस्थापक प्रमिला थापा, सञ्चार अधिकृत राजु भट्ट लगायतको उपस्थिति रहेको थियो ।
चितवन उद्योग संघका कार्यकारी निर्देशक गणेश प्रसाद सिलवालले सञ्चालन गर्नुभएको कार्यक्रमलाई चितवन उद्योग संघका उपाध्यक्ष तारा बहादुर कार्कीले धन्यवाद मन्तव्य सहित समापन गर्नुभएको थियो ।