काठमाडौं/लुम्बिनी प्रदेशको बुटवलमा ‘डिजी स्कुल अवार्ड २०८३’ सम्पन्न भएको छ। डिजी स्कुल ग्लोबलको आयोजनामा तथा टेकपाइला इनोभेसनको सहकार्यमा सम्पन्न कार्यक्रममा उत्कृष्ट विद्यार्थी, शिक्षक तथा प्रविधिमैत्री शैक्षिक संस्थाहरूलाई सम्मान गरिएको थियो।
कार्यक्रमलाई सम्बोधन गर्दै डिजी ग्रुपका अध्यक्ष विज्ञान श्रेष्ठले नेपालका विद्यालय तथा कलेजहरूमा अन्तर्राष्ट्रिय स्तरको डिजिटल शिक्षा विस्तार गर्ने उद्देश्यसहित डिजी स्कुलले बेलायती मापदण्डअनुसारको कम्प्युटर पाठ्यक्रम र अन्तरक्रियात्मक ई-लर्निङ प्रणाली सञ्चालन गरिरहेको जानकारी दिए। उनका अनुसार नेपाली विद्यार्थीलाई प्रारम्भिक तहदेखि नै विश्वस्तरीय डिजिटल सीप प्रदान गर्दै भविष्यको प्रतिस्पर्धात्मक बजारका लागि सक्षम बनाउने लक्ष्य लिइएको छ।
यही अवसरमा डिजी ग्रुप अन्तर्गत स्थापना गरिएको नयाँ सूचना प्रविधि कम्पनी ‘टेकपाइला इनोभेसन’को औपचारिक घोषणा पनि गरिएको थियो। कार्यक्रममा साइबर सुरक्षा बिज्ञ एबं टेकपाइला इनोभेसनका एसोसिएट डाइरेक्टर चिरञ्जीवी अधिकारीले युवाहरूलाई प्रविधिमार्फत आत्मनिर्भर र दक्ष बनाउने उद्देश्यसहित कम्पनी स्थापना गरिएको बताए। उनले शिक्षा र व्यावहारिक प्रविधि क्षेत्रबीचको दूरी घटाउँदै एकेडेमी, बुटक्याम्प तथा विभिन्न साझेदारीमार्फत युवाहरूलाई प्रत्यक्ष रूपमा प्रविधि उद्योगसँग जोडिने वातावरण बनाइने उल्लेख गरे।
नेपाल चेम्बर अफ कमर्शका निवर्तमान अध्यक्ष राजेन्द्र मल्लले प्रमुख अतिथिका रूपमा बोल्दै टेकपाइला इनोभेसनले सूचना प्रविधि शिक्षा र सेवाको आधार बलियो बनाउन थालेको प्रयास प्रशंसनीय रहेको बताए। यसैगरी लर्निङ्ग बाइ अर्निंग भन्ने मुला नारालाई आत्मसाथ गर्दै युवाहरुलाई नेपालमै राख्न सकेमा नेपालको डिजिटल अर्थतन्त्र सुदृढ हुनुका साथै दक्ष जनशक्ति उत्पादनमा महत्वपूर्ण योगदान पुग्ने उनको भनाइ थियो।
कार्यक्रममा सफ्टवारिका कलेज अफ आईटी एण्ड ई-कमर्सका प्रिन्सिपल प्रमोद पौडेल, सूचना प्रविधि विज्ञ अमृत थापा, डिजी स्कुल ग्लोबलकी बिजनेस हेड अनिता महर्जन तथा लुम्बिनी प्रदेश प्रमुख लेखनाथ पन्तलगायतले डिजिटल शिक्षा, प्रविधि र नवप्रवर्तनको महत्वबारे धारणा राखेका थिए।
