नवलपुर/नेपाल उद्योग व्यापार महासङ्घको अध्यक्षमा खिमनारायण पराजुली निर्वाचित भएका छन्। महासङ्घको चौथो वार्षिक साधारण सभा तथा दोस्रो राष्ट्रिय महाधिवेशनले उनलाई सर्वसम्मत रूपमा अध्यक्षमा चयन गरेको हो। नवलपुरको गैँडाकोटस्थित नारायणी रिसोर्टमा आइतबार सम्पन्न महाधिवेशनले पराजुलीको नेतृत्वमा ९९ सदस्यीय नयाँ केन्द्रीय कार्यसमिति गठन गरेको छ। नयाँ कार्यसमितिमा निवर्तमान अध्यक्ष खिम लाल भण्डारी रहेका छन् भने वरिष्ठ उपाध्यक्षमा यज्ञ प्रसाद पन्त चयन भएका छन्। त्यसैगरी उद्योग उपाध्यक्षमा दामोदर नेपाल, वाणिज्य उपाध्यक्षमा लोकजंग लामा, वस्तुगत उपाध्यक्षमा शिवराज दुवाडी र एसोसिएट उपाध्यक्षमा दिपेन्द्र विष्ट रहेका छन्।

खुला उपाध्यक्षहरूमा उपेन्द्र चौधरी, रामसुन्दर बके, प्रकाश पाण्डे र जनकराज पराजुली चयन भएका छन् भने महिला उपाध्यक्षमा कल्पना शर्मा निर्वाचित भएकी छन्।

महासचिवमा सूर्य थापा, कोषाध्यक्षमा आशीष कार्की र उपमहासचिवमा कुमार थापा चयन भएका छन्। सचिवहरूमा चेत बहादुर खड्का, मिनराज भण्डारी, प्रेम सुनार, तपेन्द्र प्रसाद जोशी र केदारनाथ अधिकारी रहेका छन् भने सह–कोषाध्यक्षमा नेत्र प्रसाद आचार्य चयन भएका छन्। नयाँ नेतृत्वले उद्योग तथा व्यापार क्षेत्रका समस्या समाधान, निजी क्षेत्रको सशक्तीकरण र आर्थिक गतिविधि विस्तारमा महत्वपूर्ण भूमिका खेल्ने अपेक्षा गरिएको छ।

यसैविच नव-निर्वाचित अध्यक्ष पराजुलीले प्रतिनिधिहरूप्रति आभार व्यक्त गर्दै आफ्नो जिम्मेवारीलाई केवल पद नभई विश्वास, अपेक्षा र उत्तरदायित्वको रूपमा लिएको बताएका छन्। उनले प्राप्त विश्वासलाई परिणाममुखी काममार्फत प्रमाणित गर्ने प्रतिबद्धता जनाएका छन्। उनले निजी क्षेत्रलाई देशको अर्थतन्त्रको मेरुदण्डको रूपमा उल्लेख गर्दै यसको अधिकार, सुरक्षा र सम्मानका लागि सशक्त आवाज उठाउने बताएका छन्। साथै, सरकारसँग सहकार्य गर्दै कर, वित्त, श्रम तथा व्यापारसम्बन्धी नीतिहरूलाई सरल, पारदर्शी र व्यवसायमैत्री बनाउन पहल गर्ने उल्लेख गरेका छन्।

पराजुलीले साना तथा मझौला उद्यम (SME) क्षेत्रलाई प्राथमिकतामा राख्दै वित्त, प्रविधि, बजार र तालिममा पहुँच विस्तार गर्न विशेष कार्यक्रम ल्याइने जानकारी दिएका छन्। संघीय संरचनाअनुसार सातै प्रदेश र जिल्ला तहसम्म महासंघको संस्थागत सुदृढीकरण गर्दै सदस्यहरूलाई प्रभावकारी सेवा प्रदान गर्ने उनको योजना रहेको छ।

महासंघभित्र सुशासन, पारदर्शिता र जवाफदेहिता कायम गर्दै संस्थालाई विश्वसनीय र पेशागत बनाउने प्रतिबद्धता पनि उनले व्यक्त गरेका छन्। अध्यक्ष पराजुलीले वर्तमान आर्थिक सुस्तता, नीतिगत अस्पष्टता र बजारका चुनौतीहरूबीच पनि एकताबद्ध निजी क्षेत्रले सबै समस्या पार गर्न सक्ने विश्वास व्यक्त गरे। उनले “समृद्ध नेपाल निर्माणमा सशक्त निजी क्षेत्र” भन्ने साझा लक्ष्य हासिल गर्न सबैलाई सहकार्यका लागि आह्वान गरेका छन्।