भरतपुर/अटोमोवाईल्स व्यवसायहरुको चाहना र अटो व्यवसायको प्रर्वद्धन गर्ने उद्देश्यका साथ चितवन अटोमोबाइल डिलर्स एशोसियसन र चितवन अटोमोवाईल एशोसिएसन को संयुक्त आयोजना र भरतपुर महानगरपालिका, चितवन उद्योग संघ तथा चितवन उद्योग वाणिज्य संघको सहकार्यमा मिति २०८३/०१/१७ देखि २१ गतेसम्म दोश्रो संस्करणको रुपमा चितवन अटो शो २०२६ आयोजना हुने भएको छ ।
भरतपुरमा आयोजित पत्रकार सम्मेलनमा चितवन उद्योग संघका अध्यक्ष मदन घिमिरेले चितवन हरेक किसिमले अगाडि बढिरहेको अवस्थामा यस्ता खाले प्रदर्शनीहरुले चितवनको आर्थिक विकासमा ठूलो टेवा पुग्ने बताउनुभयो ।
त्यस्तै चितवन उद्योग वाणिज्य संघका अध्यक्ष चिरञ्जीवी सुवेदीले अटो व्यवसायीहरुले एउटै थलोबाट आफ्ना उत्पादनहरु ग्राहकहरुलाई बिक्री वितरण गर्ने भएकोले सवारी साधान उपभोग गर्ने आम उपभोक्ताहरुलाई निकै सहज भएको बताउनुभयो ।

विभिन्न समयमा आयोजना गरिने अटो शोहरूले नयाँ–नयाँ प्रविधि, सवारी साधन र विशेष अफरहरू एकै ठाउँमा ल्याएर अटोमोबाइल बजारलाई चलायमान बनाउन, सवारीको खरिद बिक्रीमा उत्साह थप्दै, विशेष गरी विद्युतीय सवारी (ईभी) र नवीन प्रविधिहरूबारे उपभोक्तालाई सूचित र आकर्षित गर्नको लागि अटो शोको आयोजना गरिएको चितवन अटोमोबाईल डिलर्स एशोसियसनका अध्यक्ष इन्द्र प्रसाद रेग्मीले जानकारी गराउनु भयो ।

विश्व बजारमा भित्रिएका नयाँ सवारी र स्मार्ट मोबिलिटी सोलुसनहरू नेपाली उपभोक्ता सामु प्रस्तुत गर्न, विद्युतीय सवारीसाधन (ईभी) र स्मार्ट प्रविधिको बारेमा जानकारी दिई यसको प्रयोगलाई प्रोत्साहन गर्न, सुस्ताएको अटोमोबाइल बजारलाई चलायमान बनाउन र अर्थतन्त्रमा सकारात्मक उर्जा थप्न, सवारीसाधन, स्पेयर पाट्र्स, लुब्रिकेन्ट्स र बैंकिङ सेवा एकै ठाउँमा उपलब्ध गराउने, ग्राहकहरुले विभिन्न कम्पनीका नयाँ मोडलका सवारी साधनहरूसँगै विशेष छुट र फाइनान्स सुविधाहरू उपलब्ध गराउन, नयाँ सवारी साधन किन्नु अघि निरीक्षण गर्ने र बजारको अवस्था बुझ्ने उत्तम अवसर रहने अटो शोको मुख्य उद्देश्य रहेको चितवन अटो शो २०२६ का संयोजक राजन पियाले जानकारी गराउनु भयो ।

अटो शमोमा साना ठुला गरी विभिन्न ब्राण्डका कार, जिप, मोटरसाइकल र स्कुटरहरुका ७५ स्टल रहनेछन् । अटो शो अन्तर्गत बैक तथा इन्स्योरेन्स कम्पनीहरुको स्टल पनि रहनेछन् । अटो शो को अववसरमा ग्राहकहरुलाई अन द स्पोर्ट फाईनान्स तथा इन्स्योरेन्स सेवा उपलव्ध हुनेछ । अटो शोमा सवारी साधन किन्ने ग्राहकहरुलाई सवारी साधन कम्पनीहरुले आकर्षक स्कीम तथा छुटको व्यवस्था सँगै अटो शोको अवलोकन गर्ने ग्राहकहरु मध्येबाट ३ जनालाई लक्की ड्र मार्फत आर्कषक उपहारको ब्यवस्था गरिनेछ छ । अटो शोको लागि बनाईएका विज्ञापन सामाग्री जस्तैः इन्स्ट्राग्राम, टिकटक, फेसबुक रिलहरुमा बढी भ्युज र शेयर हुने व्यक्तिहरुलाई समेत पुरस्कृत गरिने पियाले बताउनुभयो ।

अटो शोमा पुरानो भेन्टेज सवारी साधनहरु र महङ्गो बिग बाइकको प्रदर्शनी समेत गरिनेछ । मोटरसाईकल स्टण्ड, जिमखाना, टिडिएस ¥याली लगायतका खेलकूदको समेत आयोजना गरिने अटो शोको तेश्रो दिन नेपालकै अटोमोवाईल्स क्षेत्रमा लामो समय अनुभव सम्हालेका विज्ञहरुबाट “अटो सेमिनार”, चौथो दिन चितवन आसपासका विभिन्न विद्यालयहरुमा कक्षा ४ देखि ८ सम्म अध्ययन गर्ने विद्यार्थी तथा विद्यार्थीका अभिभावकहरुको उपस्थितिमा “हेल्मेट प्रयोगको सचेतना एवम् अन्तर्राष्ट्रियस्तरको हेल्मेट वितरण” कार्यक्रम र उद्घाटनको दिन हुने सवारी साधनको ¥याली कार्यक्रमलाई नेपाल अटोमोवाईल स्पोर्ट एशोसिएसन (नासा) बागमती प्रदेशले सहकार्य गरेको छ । कार्यक्रमलाई महिन्द्राले मुख्य प्रायोजकको रुपमा सहयोग गरेको छ भने एमजिले सहप्रायोजकको रुपमा सहयोग गरेका छन् ।

करीब १० हजार जनाले अवलोकन गर्ने लक्ष्य लिइएको अटो शोमा ५० करोड बराबरको आर्थिक कारोबार हुने अनुमान गरिएको छ । दैनिक स्थानीय कलाकारहरुद्वारा साँस्कृतिक कार्यक्रमको समेत आयोजना गरिने आयोजकले जनाएको छ । अटो व्यवसायी कमल अधिकारीले सञ्चालन गर्नुभएको कार्यक्रमलाई चितवन अटोमोवाईल्स एशोसिएसनका अध्यक्ष मोहन के.सी.ले धन्यवाद मन्तव्य सहित समापन गर्नुभएको थियो ।