भरतपुर/अन्तर्राष्ट्रिय डेरी एक्स्पो २०८२ अन्तर्गत तेश्रो दिन डेरी उद्यम र कृषकसँग सम्बन्धित विषयमा कार्यपत्र प्रस्तुत सहितको प्यानल छलफल सम्पन्न भएको छ ।
चितवन उद्योग संघका उपाध्यक्ष एवम् प्यानल छलफल कार्यक्रमका संयोजक गोपाल प्रसाद गैरेले स्वागत मन्तव्य राख्नुभएको कार्यक्रममा चितवन जिल्ला दुग्ध उत्पादक सहकारी संघ लि.का अध्यक्ष किशोर बगालेले प्यानल छलफल कार्यक्रमको उद्देश्य प्रकाश पार्नुभएको थियो ।
कार्यक्रममा भरतपुर महानगरपालिका, पशुपन्छी महाशाखा पशु विकास अधिकृत डा. रविन वस्ताकोटीले पशुपालनमा देखिने रोग र उपचार विधि, नेपाल कृषि अनुसन्धान परिषद्, राष्ट्रिय गाई अनुसन्धान कार्यक्रमका वैज्ञानिक डा.उद्धव पनेरुले दुध तथा दुग्धजन्य पदार्थको बजारीकरण ः स्वदेशी बजारको सुदृढिकरण र निर्यातको लागि अवसर र चुनौति, कृषि तथा वन विज्ञान विश्वविद्यालय रामपुर चितवनका प्रा.डा.निराजन भट्टराईले प्रविधि र गुणस्तरीय दुध उत्पादन ः प्रविधिमा आधारित गुणस्तरीय दुग्ध उत्पादन, वर्तमान अवस्था र तत्कालिन सुधारको मार्गचित्र, राष्ट्रिय दुग्ध विकास वोर्डका निर्देशक डा.हसना श्रेष्ठले नेपालमा दुध क्षेत्रको वर्तमान अवस्था र भावि गन्तब्य, Patna Dairy Project (Sudha) India : Use of Modern Technology for Quality Enhancement, Productivity Increment and Marketing in Dairy Sector लगायतका विषयमा आ–आफ्नो प्रस्तुति गरेका थिए । प्रस्तुत सहितको प्यानल छलफल कार्यक्रमलाई पत्रकार रामकान्त पौडेलले सहजीकरण गर्नुभएको थियो । छलफलमा कृषक तथा व्यवसायीहरुको तर्फबाट चेत प्रसाद ढकाल, राजेन्द्र सडौला, प्रदिप तिमिल्सिना, पूर्ण सिहं राउत, विन्देश्वर कुमार यादव लगायतले डेरी र कृषकबीचको समस्याहरुको बारेमा आ–आफ्नो धारणा राखेका थिए ।
सहभागीहरुबाट आएका जिज्ञासाहरुलाई राष्ट्रिय दुग्ध विकास बोर्डका कार्यकारी निर्देशक डा.राजेन्द्र यादव, नेपाल सरकार, कृषि तथा पशुपन्छी विकास मन्त्रालयका सह–सचिव डा.शरण पाण्डे, बागमती प्रदेश सरकार, कृषि तथा पशुपन्छी विकास मन्त्रालयका सचिव बैकुष्ठ अधिकारी, केन्द्रीय दुग्ध सहकारी संघ लि.का अध्यक्ष अमर बहादुर कुँबर, नेपाल फार्मस् एड्भाइजरी काउन्सिल प्रा.लि.का प्रबन्ध निर्देशक डा.विमल कुमार निर्मल लगायतले प्रष्ट्याउनु भएको थियो ।
त्यस्तै, प्रदर्शनीको चौथो दिन दुग्ध क्षेत्रसँग सम्वन्धित हाजिरी जवाफ प्रतियोगिता, उन्नत जातको गाई प्रर्दशनी, सातै प्रदेशको कृषि तथा पशुपन्छी मन्त्रालयको सिफारिसमा एक–एक वटा उत्कृष्ट दुग्ध उत्पादक सहकारी सम्मान कार्यक्रम सञ्चालन हुँदैछ । चितवन जिल्ला दुग्ध उत्पादक सहकारी संघ लि.सचिव कल्याण अधिकारीले सञ्चालन गर्नुभएको कार्यक्रमलाई चितवन उद्योग संघका अध्यक्ष मदन घिमिरेले धन्यवाद मन्तव्य सहित समापन गर्नुभएको थियो ।