चितवन/आगामी प्रतिनिधि सभा निर्वाचनका लागि चितवन क्षेत्र नं. १ मा प्रगतिशील लोकतान्त्रिक पार्टीले जेन–जी उम्मेदवार विकास कामी (स्नेही) लाई अघि सारेको छ। युवा राजनीतिक नेता तथा सामाजिक अभियन्ताका रूपमा परिचित कामीले “मिशन चितवन–१ : ४० दिने ‘विजय संकल्प’” नामक रणनीतिक चुनावी कार्ययोजना सार्वजनिक गर्दै नयाँ पुस्ताको नेतृत्व र जनमुखी विकासको एजेन्डा प्रस्तुत गरेका छन्।

Advertisement

चितवन क्षेत्र नं. १ का रत्ननगर, खैरहनी र राप्ती नगरपालिकालाई केन्द्रमा राखी तयार गरिएको यस योजनाले भौगोलिक केन्द्र, लक्षित मतदाता र कार्यक्षेत्रअनुसार रणनीति तय गरेको छ। शहरी इन्जिन र युवामैत्री मतदातालाई लक्षित रत्ननगर, जातीय र कृषि मत निर्णायक मानिने खैरहनी तथा विकास र सिंचाइका मुद्दा प्रमुख रहेको राप्ती नगरपालिकामा फरक–फरक अभियान सञ्चालन गरिने बताइएको छ।

योजनाअनुसार घरदैलो, साना बैठक, डिजिटल प्रचार, प्रभावशाली व्यक्तिको सार्वजनिक समर्थन र विपक्षी भ्रमको तत्काल खण्डन मुख्य रणनीति हुन्। युवालाई डिजिटल अभियानको अग्रपंक्तिमा राख्दै टिकटक, फेसबुक लाइभ र तथ्यमा आधारित सन्देश प्रवाह गरिनेछ। अन्तिम चरणमा स्वयंसेवक तालिम, ‘गो-टु-होम’ अभियान र मतदान दिन मतदाता परिचालनलाई प्राथमिकता दिइएको छ।

विकास कामीको राजनीतिक एजेन्डा भूमिहीन बसोबासीलाई लालपुर्जा वितरण, किसानका लागि वडास्तरमा मल बैंक स्थापना, युवाका लागि स्थानीय रोजगारी र उद्यमका अवसर सिर्जना जस्ता व्यवहारिक समाधानमा केन्द्रित छ। इमानदार नेतृत्व, पारदर्शी शासन र श्रमिक वर्गलाई प्रत्यक्ष लाभ पुग्ने नीतिको पक्षमा उभिएका उनी सामाजिक न्याय, युवा सशक्तीकरण र दिगो विकासप्रति प्रतिबद्ध छन्।

नयाँ पुस्ताको विश्वास जित्ने उद्देश्यसहित अघि बढेको यस अभियानले चितवन–१ मा वैकल्पिक र जिम्मेवार नेतृत्वको बहसलाई थप बलियो बनाउने अपेक्षा गरिएको छ।