माडी/चितवन क्षेत्र नं. ३ की उम्मेदवार रेनु दाहालले माडी नगरपालिका–९ स्थित विकट हनुमानझुला क्षेत्रमा घरदैलो अभियान सञ्चालन गर्दै स्थानीय जनताका समस्या, गुनासा र सुझाव संकलन गरेकी छन्। अभियानका क्रममा दाहाल स्थानीयवासीको घर–घरमा पुगेर प्रत्यक्ष संवादमा सहभागी भइन्। स्थानीयवासीहरूले सडक, विद्युत्, खानेपानी, शिक्षा, स्वास्थ्य तथा भूमि व्यवस्थापनका समस्या वर्षौंदेखि समाधान हुन नसकेको गुनासो गरेका छन्। हनुमानझुला क्षेत्र निकुञ्जसँग जोडिएकाले विकास निर्माणका काम बारम्बार रोकिँदै आएको, विद्युत् विस्तारका लागि पोल गाडिए पनि निकुञ्ज ऐनका कारण लाइन विस्तार हुन नसकेको स्थानीयको भनाइ छ। त्यस्तै, भूमिहीन तथा सुकुम्बासी परिवारले निस्सा पाए पनि लालपूर्जा नपाउँदा बैंकिङ सेवा, अनुदान र सरकारी सुविधाबाट वञ्चित हुनुपरेको गुनासो गरेका छन्। वर्षायाममा कच्ची सडक हिलाम्मे हुँदा आवत–जावत कठिन हुने, बिरामी पर्दा अस्पताल लैजान समस्या हुने र एम्बुलेन्ससमेत पुग्न नसक्ने अवस्था रहेको स्थानीयले बताएका छन्। घरदैलोका क्रममा उम्मेदवार दाहालले विगतमा नेपाल कम्युनिस्ट पार्टीका संयोजक पुष्पकमल दाहाल ‘प्रचण्ड’ले गरेका प्रतिबद्धताअनुसार भूमिहीनलाई निस्सा वितरण र जग्गा नापजाँचको काम अघि बढाइएको उल्लेख गर्दै बाँकी प्रक्रिया आफूले पूरा गर्ने प्रतिबद्धता जनाइन्। उनले लालपूर्जा वितरणलाई प्राथमिकतामा राखेर पहल गर्ने बताइन्। उनले यसअघि चितवन क्षेत्र नं. ३ का उम्मेदवार डा. भोजराज अधिकारीले जनतासँग अस्पताल निर्माणसम्बन्धी प्रतिबद्धता जनाएको तथा तत्कालीन मेयर एवं हालका प्रदेश सांसदले स्थानीय मागहरू सम्बोधन गर्दै आएको उल्लेख गर्दै अधुरा कामहरू अब आफूले जिम्मेवारीसाथ सम्पन्न गर्ने बताइन्। दाहालले “आफूले बोलेअनुसार काम गर्ने” स्पष्ट प्रतिबद्धता जनाउँदै विद्युत् विस्तार, सडक स्तरोन्नति, खानेपानी सुविधा र आधारभूत स्वास्थ्य सेवामा सुधार गर्ने बताइन्। निकुञ्ज ऐनका कारण रोकिएका विकासका कामहरूका लागि सम्बन्धित निकायसँग समन्वय गरी समाधान खोज्ने उनको भनाइ छ। स्थानीयवासीहरूले दीर्घकालीन समस्या समाधान हुने अपेक्षासहित उम्मेदवार दाहालप्रति विश्वास व्यक्त गर्दै यसपटक विकासले गति लिने आशा गरेको बताएका छन्।