भरतपुर/चितवन उद्योग संघ, खैरहनी समितिको सातौं वार्षिक साधारण सभा तथा चौथो अधिवेशनबाट निर्वाचित कार्यसमितिको अमलटारी सामुदायिक होमस्टे, बाघखोर, कावासोतीमा कार्ययोजना तर्जुमा गोष्ठी सम्पन्न भएको छ ।

चितवन उद्योग संघ, खैरहनी समितिका अध्यक्ष प्रतिभा श्रेष्ठको अध्यक्षतामा सम्पन्न गोष्ठीमा खैरहनी नगरपालिकाका नगर प्रमुख शशीकुमार खनियाँ प्रमुख अतिथि रहनुभएको थियो । प्रमुख अतिथि खनियाँले उद्योग संघ, खैरहनी समितिले औद्योगिक प्रबद्र्धनात्मक कार्यक्रमहरु ल्याए आफूहरु सहयोग गर्न तयार रहेको बताउनुभयो । उहाँले उद्योगी, व्यवसायीहरुको समस्याहरुलाई नजिकबाट बुझेकोले उद्योगीहरुको जायज मागहरुमा सहकार्य गर्न आफूहरु तयार रहने बताउनुभयो ।

त्यस्तै कार्यक्रमका विशिष्ट अतिथि चितवन उद्योग संघका अध्यक्ष मदन घिमिरेले संघका पालिका समितिहरु मध्ये खैरहनी पालिका समितिले राज्यलाई ठूलो मात्रमा कर तिर्ने गरेको र यस क्षेत्रका उद्यमीहरुमा उद्योगमैत्री वातावरण सिर्जना गर्न तिनै तहका सरकारहरुको सहयोग आवश्यक रहेको बताउनुभयो ।

चितवन उद्योग संघ, खैरहनी समितिका अध्यक्ष प्रतिभा श्रेष्ठले स्वागत मन्तव्य सहित कार्यक्रमको उद्देश्य माथि प्रकाश पार्नुभएको कार्यक्रममा खैरहनी समितिका उपाध्यक्ष प्रकाश बस्नेतले सेमिनार, गोष्ठी, प्रदर्शनी तथा कार्यक्रम विभाग, उपाध्यक्ष जिनिता बस्नेतले संगठन तथा सदस्य बिस्तार विभाग, उपाध्यक्ष लक्ष्मी थापा खरालले सामाजिक उत्तरदायित्व तथा औद्योगिक भ्रमण विभाग, सचिव सुष्मा शिवाकोटीले सचिवालय तथा नीति निर्माण विभाग, महिला उद्यमी मञ्चकी कार्यसमिति सदस्य एलिना सुनारले महिला समिति, खैरहनी समिति, युवा उद्यमी मञ्चका अध्यक्ष नवराज रावलले युवा उद्यमी मञ्चले तयार पारेको प्रतिवदेनहरु प्रस्तुत गरेका थिए ।

विभागीय तथा महिला तथा युवा उद्यमी मञ्चका प्रतिवेदनहरु माथि मुख्य समिक्षक चितवन उद्योग संघ, खैरहनी समितिका निवर्तमान अध्यक्ष युवराज पाठकले समिक्षा गरी आफ्नो धारणाहरु राख्नुभएको थियो ।

कार्यक्रम अन्तर्गत खैरहनी समितिको कार्यसमिति सदस्यमा मनोनित उमाकान्त नेपाल र अनु हुमागाईलाई स्वागत समेत गरिएको थियो ।

त्यस्तै कार्यक्रम अन्तर्गत आ.व.२०८०÷०८१ मा खैरहनी नगरपालिका भित्रका उद्योगहरु मध्ये सबैभन्दा बढी आयकर तिर्ने सूचीमा पर्न सफल भई आन्तरिक राजश्व कार्यालय पर्साबाट समेत सम्मानित हुनुभएको चितवन उद्योग संघ, खैरहनी समितिको सदस्य उद्योग नव पुष्पाञ्जली कपी तथा स्टेशनरी उद्योगका सञ्चालक खैरहनी नगरपालिका वडा नं.–१, चितवन निवासी केशवराज खनाल, खैरहनी नगरपालिका भित्रका उद्योगहरु मध्ये सबैभन्दा बढी रोजगारी प्रदान गरी यसअघिका आर्थिक वर्षहरुमा आयकर तिर्ने सूचीमा पर्न सफल भई आन्तरिक राजश्व कार्यालय पर्साबाट समेत सम्मानित हुनुभएको चितवन उद्योग संघ, खैरहनी समितिको सदस्य उद्योग कैलाशपति एग्रो का सञ्चालक खैरहनी नगरपालिका वडा नं.–९, चितवन निवासी केशव वाग्लेलाई सम्मान गरिएको थियो ।

चितवन उद्योग संघ, खैरहनी समितिका सचिव सुष्मा शिवाकोटीले सञ्चालन गर्नुभएको कार्यक्रमलाई चितवन उद्योग संघ, खैरहनी समितिका अध्यक्ष प्रतिभा श्रेष्ठले धन्यवाद मन्तव्य सहित कार्यक्रमको समापन गर्नुभएको थियो ।