भरतपुर/भरतपुरस्थित बोस्टन इन्टरनेसनल कलेजले पहिलोपटक दुईदिने व्यापार, नवप्रवर्तन, सुशासन तथा दिगोपनासम्बन्धी अन्तर्राष्ट्रिय सम्मेलन आयोजना गर्ने भएको छ । कलेजले पत्रकार सम्मेलन गरी मङ्सिर १२ र १३ गते कलेज परिसरमा हुने अन्तर्राष्ट्रिय सम्मेलनबारे जानकारी दिएको हो ।
सम्मेलनमा आठवटा टेक्निकल सेसनमा कुल ७६ वटा अनुसन्धान शोधसार प्रस्तुत हुनेछन्, जसमध्ये ४१ वटा सोधसार बोस्टन कलेजका विद्यार्थी तथा सङ्कायले प्रस्तुत गर्ने बोस्टन कलेजको रिसर्च म्यानेजमेन्ट सेल प्रमुख डा. सुनिल पोखरेलले जानकारी दिए ।
सम्मेलनमा नेपालसहित इटाली, मलेसिया, हङ्कङ, भारत, अस्ट्रेलियाका शैक्षिक एवम् अनुसन्धान विज्ञहरुले कि–नोटहरु प्रस्तुत गर्नेछन् ।
सम्मेलनको प्रमुख आकर्षणमा आठवटा टेक्निकल सेसनमा ७६ वटा अनुसन्धान शोधसार प्रस्तुतीकरण र व्यवसाय, नवप्रवर्तन तथा सुशासनमार्फत दिगोपनाको अवधारणालाई प्रवद्र्धन गर्ने विषयमा बहस र अन्तक्र्रिया हुनेछ । त्यसैगरी, राष्ट्रिय तथा अन्तर्राष्ट्रिय विज्ञहरुसँग अन्तक्र्रियात्मक सत्र र नेटवर्किङ अवसर र बहुविषयक अनुसन्धान र अन्तर्राष्ट्रिय सहकार्य प्रवद्र्धन गर्ने प्लेटफर्म रहेका छन् ।
सम्मेलनमा प्रमुखअतिथि पोखरा विश्वविद्यालयका उपकुलपति प्राडा वेदराज केसी रहने छन् भने विशिष्ट अतिथिमा पूर्वाञ्चल विश्वविद्यालयका उपकुलपति प्राडा बिजुकुमार थपलिया र त्रिभुवन विश्वविद्यालयका डिन प्राडा महानन्द चालिसे, पोखरा विश्वविद्यालयका डिन प्राडा ज्ञानेश्वर शर्मालगायतका अतिथि सहभागी हुनेछन् । सम्मेलनमा पाँच बढी देशका करिब १५० जना शैक्षिक व्यक्तित्वहरु सहभागी हुनेछन् ।
