चितवन/कालिका नगरपालिका–७, भटेनीस्थित पृथ्वी माध्यमिक विद्यालयमा विदेशी विशेषज्ञ डाक्टरहरुको टोलीले विद्यार्थीहरूको मुख तथा दाँतको निःशुल्क उपचार सुरू गरेको छ । विद्यालयका विद्यार्थीहरूको स्वास्थ्य संरक्षणका लागि सामुदायिक सहयोग केन्द्र नेपालको आयोजनामा तथा चितवन सहायता कोष बेल्जियमको सहयोग र मेडोरा बेल्जियमको प्राविधिक सहयोगमा तीन दिने निःशुल्क दन्त शिविर सञ्चालन गरिएको हो ।
केन्द्रका महासचिव गुणराज थपलियाका अनुसार मेडोरा बेल्जियममा आबद्ध चार जना विदेशी विशेषज्ञ डाक्टर—डा. अनिता लिनाड्स, डा. क्रिष्टियम, डा. जोशीका र डा. इल्स—शिविरमा खटिएका छन् । उनीहरूले नेपाली चिकित्सकहरूको सहयोगमा विद्यालयका बालबालिकाको दाँत तथा मुखको उपचार गर्दैछन् । शिविरमा उपचार गराएका विद्यार्थीलाई औषधि पनि निःशुल्क प्रदान गरिएको छ । पहिलो दिन करिब १०० विद्यार्थीको उपचार सम्पन्न भएको विद्यालयले जनाएको छ ।
पृथ्वी माविमा हाल १,२६० विद्यार्थी अध्ययनरत छन्, जसमा अधिकांश गरिब तथा विपन्न परिवारका बालबालिका छन् । विद्यालयका सबै विद्यार्थीको उपचार तीन दिनभित्र सम्पन्न गरिने लक्ष्य राखिएको छ । शिविरको उद्घाटन कालिका नगरपालिकाका मेयर विनोद रेग्मीले गरेका थिए । उनले स्थानीय सरकारले नगरवासीको स्वास्थ्य सुरक्षालाई प्राथमिकतामा राखेको बताउँदै “बाहिरबाट आएर सेवामुखी काम गर्ने संघसंस्थालाई हामी स्वागत गर्छौं,” भने ।
नेपाल रेडक्रस सोसाइटीका पूर्वमहामन्त्री हरिप्रसाद न्यौपानेले विदेशी विशेषज्ञ डाक्टरद्वारा ग्रामीण क्षेत्रमा गरिने उपचारले ठूलो राहत मिल्ने बताए । कार्यक्रममा सामुदायिक सहयोग केन्द्रकी उपाध्यक्ष सुजता विष्टले ग्रामीण बालबालिकाको मुख र दाँत स्वास्थ्य सुधार गर्ने उद्देश्यले पृथ्वी माविलाई छनोट गरिएको बताइन् । चितवन सहायता कोष बेल्जियमका अध्यक्ष ईश्वरीप्रसाद कँडेलले संस्थाले शिक्षा र स्वास्थ्यका क्षेत्रमा विपन्न समुदायका लागि निरन्तर काम गरिरहेको जानकारी दिए ।
उद्घाटन कार्यक्रममा विद्यालय व्यवस्थापन समितिका अध्यक्ष अमृत लामिछानेको अध्यक्षता रहेको थियो । कार्यक्रममा चितवन सहायता कोष बेल्जियमकी संस्थापक अध्यक्ष सीता सापकोटा, पूर्वअध्यक्ष पार्वती अधिकारी, दिनेशप्रसाद भण्डारीलगायतको उपस्थिति रहेको थियो । कार्यक्रम विद्यालयका आधारभूत तह इन्चार्ज विष्णुलाल श्रेष्ठले सञ्चालन गरेका थिए ।
Advertisement
