चितवन/चितवनका संस्थागत विद्यालयहरू आज भदौ २४ गते (मंगलबार) बन्द गरिएको छ । मंगलबार निजी विद्यालयहरूको छाता संगठन प्याब्सन चितवन र संस्थागत विद्यालय अभिभावक संघ, चितवनले संयुक्त अपिल जारी गर्दै विद्यालय बन्द रहने घोषणा गरेको हो ।  प्याब्सन चितवनका अध्यक्ष मदन पुरी र संस्थागत विद्यालय अभिभावक संघ, चितवनका अध्यक्ष सूर्यकान्त न्यौपानेद्वारा हस्ताक्षरित अपिलमा भनिएको छ– ‘भदौ २३ गते काठमाडौँलगायत विभिन्न सहरहरूमा भएका प्रदर्शनका क्रममा ठूलो सङ्ख्यामा विद्यार्थी तथा सर्वसाधारणको निधन भएकोप्रति हामी गहिरो दुःख व्यक्त गर्दछौँ, घाइतेहरूको शीघ्र स्वास्थ्यलाभको कामना गर्दै दिवङ्गत विद्यार्थी तथा सर्वसाधारणप्रति भावपूर्ण श्रद्धाञ्जली व्यक्त गर्दछौँ साथै मृतकका परिवारजनप्रति गहिरो समवेदना व्यक्त गर्दछौँ ।’
जारी गरिएको अपिलमा आफ्ना बाबुनानीहरूलाई घरमै सुरक्षित र संयमित राख्न अभिभावकसँग अनुरोध गरिएको छ भने घाइतेहरूको उपचारमा कुनै कमि हुन नदिन र वार्ताको माध्यमबाट यथाशीघ्र समस्याको समाधान निकाल्न आग्रह गरिएको छ ।
महानगरले भन्यो– ‘विद्यालय दुई दिन बन्द’ :
यसैबीच, भरतपुर महानरपालिकाको शैक्षिक प्रशासन महाशाखाले एक सूचना जारी गर्दै यस विषम परिस्थितिमा भरतपुर महानगरभित्रका सामुदायिक, संस्थागत र मन्टेस्वरीलगायतका सम्पूर्ण शैक्षिक संस्था बन्द गर्न निर्देशन दिएको छ । सूचनामा ‘पछिल्लो समय विकसित घटनाक्रमलाई मध्यनजर गर्दै भरतपुर महानगरपालिकाभित्रका सम्पूर्ण सामुदायिक, संस्थागत, मन्टेस्वरीलगायतका सम्पूर्ण शिक्षण संस्था भदौ २४ र २५ गते दुई दिन बिदा हुने व्यहोरा निर्देशानुसार जानकारी गराइन्छ ।’