भरतपुर/चितवनको भरतपुरस्थित स्टेप बाइ स्टेप स्कुलले रजत जयन्ती विशेष कार्यक्रमसहित मनाउने भएको छ । शनिबार विद्यालयको सभाहलमा आयोजित पत्रकार सम्मेलनमा विद्यालयले कार्यक्रमहरूको विस्तृत विवरण सार्वजनिक गरेको हो । विद्यालयका प्राचार्य कृष्णप्रसाद भट्टले १५ जना शिक्षाप्रेमीको संयुक्त प्रयासमा विद्यालय स्थापना भएको स्मरण गर्दै, “गुणस्तरको शिक्षा दिनका लागि युद्धस्तरमा प्रयास गर्नुपर्ने” आवश्यकता औंल्याउनुभयो । २०६१ सालमा ८१ विद्यार्थी र १२ कर्मचारीबाट सुरु भएको विद्यालय अहिले १६०५ विद्यार्थी र ११६ जना शिक्षक–कर्मचारीसहित स्थापित शैक्षिक संस्थाका रूपमा विकसित भएको छ ।

कार्यक्रम तालिका

२१ भदौ – साइकल र्याली (विद्यालयबाट सुरु)

२८ भदौ – निबन्ध लेखन प्रतियोगिता

३ असोज – अन्तर विद्यालय कर्मचारी भलिबल प्रतियोगिता

४ असोज – शिक्षक फुटसल, अभिभावक हाजिरजवाफ, रक्तदान कार्यक्रम

१५ कार्तिक – जिल्ला स्तरिय हाजिरजवाफ प्रतियोगिता

२२ कार्तिक – विद्यार्थी फुटसल

२८ कार्तिक – वक्तृत्वकला प्रतियोगिता

२९ कार्तिक – सामुदायिक विद्यालयलाई सहयोग

३० कार्तिक – नृत्य प्रतियोगिता

१ मंसिर – ट्राफिक सचेतना कार्यक्रम (विद्यालय सभाहल)

४–७ मंसिर – आन्तरिक खेलकुद प्रतियोगिता

८ मंसिर – पुरस्कार वितरण

९ मंसिर – समापन समारोह

रजत जयन्ती मुख्य समारोहका लागि प्राचार्य भट्टको संयोजकत्वमा समिति गठन गरिएको छ । विद्यालयले विगत ६ वर्षदेखि निरन्तर स्मारिका प्रकाशन गर्दै आएकोमा यसपालि पनि प्रकाशन गरिने जनाएको छ । प्राचार्य भट्टले रजत जयन्तीलाई “खर्चिलो र भड्किलो भन्दा सिर्जनात्मक” तरिकाले मनाइने उल्लेख गर्दै, एआईको युगमा विद्यार्थी मात्र होइन शिक्षक पनि सिर्जनात्मक बन्नुपर्नेमा जोड दिनुभयो । कार्यक्रममा भरतपुर महानगरका नगर शिक्षा अधिकारी सुभास चन्द्र आचार्यले विद्यालयले २५ वर्षमा शैक्षिक क्षेत्रमा उल्लेख्य योगदान गरेको भन्दै शुभकामना व्यक्त गर्नुभयो । साथै, विद्यालय संस्थागत नभए अस्तित्व नै जोखिममा पर्ने चेतावनी दिँदै समुदायका विपन्न विद्यार्थीलाई निःशुल्क शिक्षा उपलब्ध गराउने नीतिमा सहकार्य गरेकोमा विद्यालयलाई धन्यवाद दिनुभयो । रजत जयन्ती पूर्वसन्ध्यामा आयोजित लोगो अनावरण समारोहका अतिरिक्त गतिविधि प्रमुख विष्णु पोखरेलले सहजीकरण गर्नुभएको थियो । कार्यक्रम विद्यालय सञ्चालक समितिका अध्यक्ष जे. भी. गुरुङको सभाध्यक्षतामा सम्पन्न भएको थियो ।