राप्ती, १७ असोज/चितवन उद्योग संघ राप्ती इकाई समितिको प्रथम साधारण–सभा एक कार्यक्रमका बीच सम्पन्न भएको छ । राप्ती इकाई समितिका अध्यक्ष टंकप्रसाद उप्रेतीको अध्यक्षतामा सम्पन्न साधारण–सभामा राप्ती नगरपालिकाका प्रमुख प्रभा बराल प्रमुख अतिथि रहनुभएको थियो ।

साधारणसभामा चितवन उद्योग संघका बरिष्ठ उपाध्यक्ष एवं सरकारी एवं गैह सरकारी समन्वय विभागका संयोजक त्रिलोचन कँडेल, निर्वतमान अध्यक्ष भेषराज दुवाडी विशिष्ट अतिथि रहनुभएको थियो भने, चितवन उद्योग संघका उपाध्यक्ष एवं संगठन बिस्तार विभागका संयोजक गजेन्द्र अधिकारी, कार्यकारी निर्देशक गणेशप्रसाद सिलवाल, नेकपा राप्तीका इन्चार्ज मानबहादुर स्याङबो, नेपाली काँग्रेस राप्तीका सभापति नारायणप्रसाद उप्रेती, नेपाल अण्डा उत्पादक संघका केन्द्रीय उपाध्यक्ष किरण भुषण ओली, चितवन उद्योग संघका कार्यसमिति सदस्य एवं महिला उद्यमी मञ्चका अध्यक्ष सुधा सुवेदी पौडेल, कार्यसमिति सदस्य एवं युवा उद्यमी मञ्चका अध्यक्ष अमर घिमिरे, प्रशासकीय अधिकृत गोविन्द प्रसाद पौडेल, सञ्चार अधिकृत राजु भट्ट, स्टोर किपर उमेश श्रेष्ठ लगायत राप्ती क्षेत्रका उद्योगीहरुको उपस्थिति रहेको थियो ।

साधारण–सभामा इकाई समितिका अध्यक्ष टंकप्रसाद उप्रेतीले प्रस्तुत गर्नुभएको बार्षिक कार्यप्रगति र भावी योजना समावेश भएको अध्यक्षको प्रतिवेदन, कोषाध्यक्ष सुदिप ओस्तीले प्रस्तुत गर्नुभएको आ.व.०७६/०७७ को आर्थिक प्रतिवेदन माथि छलफल गरी सभाका सदस्यहरुले सर्वसम्मत रुपमा पास गरेका थिए ।

बार्षिक साधारणसभाको अवसरमा चितवन उद्योग संघ, राप्ती इकाई समितिमा आवद्ध रही सञ्चालनमा रहेका सदस्य उद्योगहरु मध्येबाट इकाई समितिका गतिविधिहरुमा सहभागिता र निर्वाह गरेको भूमिकाको आधारमा समितिले गरेको मूल्याङ्कनमा सक्रिय महिला उद्यमीतर्फ कृष्णमाया मानन्धर र सक्रिय युवा उद्यमीतर्फ बुद्धिराम चौधरीलाई हार्दिक बधाई ज्ञापन गर्दै सम्मान समेत गरिएको थियो ।

त्यसैगरी साधारण–सभाले बुद्धिराम चौधरीको संयोजकत्वमा युवा उद्यमी मञ्च र कृष्णमाया मानन्धरको संयोजकत्वमा महिला उद्यमी मञ्च राप्ती समेत गठन गरेको छ ।

चितवन उद्योग संघका प्रशासकीय अधिकृत गोविन्द प्रसाद पौडेलले सञ्चालन गर्नुभएको कार्यक्रममा संघका कार्यकारी निर्देशक गणेशप्रसाद सिलवालले चितवन उद्योग संघ र चितवन औद्योगिक विकास साकोसका गतिविधि र सञ्चालन प्रक्रियाका बारेमा प्रस्तुतिकरण गर्नुभएको थियो ।