भरतपुर/चितवन उद्योग संघको आयोजनामा नेपाल उद्योग परिसंघका अध्यक्ष एवम् पदाधिकारीसँग वर्तमान औद्योगिक अवस्था र औद्योगिक प्रबद्र्धनका विषयमा छलफल सम्पन्न भएको छ । चितवन उद्योग संघका कार्य वाहक अध्यक्ष मदन घिमिरेको अध्यक्षतामा सम्पन्न कार्यक्रममा वर्तमान औद्योगिक अवस्था र औद्योगिक प्रबद्र्धनका विषयमा उद्योगीहरुबीच छलफल तथा अन्तरक्रिया समेत गरिएको थियो ।
चितवन उद्योग संघका कार्य वाहक अध्यक्ष मदन घिमिरेले चितवन उद्योग संघले अघि सारेका महत्वपूर्ण परियोजनाहरु चितवन प्रदर्शनी केन्द्र, प्रस्तावित शक्तिखोर औद्योगिक क्षेत्र, भरतपुर महानगरपालिका वडा नं. २९, जुरेथुम्कामा रहेको प्रस्तावित औद्योगिक शिक्षालयसँगै नेपाल उद्योग परिसंघ र चितवन उद्योग संघबीचको हालको अवस्था र अबको कार्यदिशाको बारेमा आफ्नो धारणा राख्नु भएको थियो ।
छलफल कार्यक्रममा चितवन उद्योग संघका कार्यकारी निर्देशक गणेश प्रसाद सिलवालले चितवन उद्योग संघले विगतदेखि वर्तमान सम्म कार्यान्वयनमा ल्याइएका महत्वपूर्ण परियोजनाहरु र ती परियोजनाहरुलाई पूर्ण रुपमा सञ्चालनमा ल्याउनको लागि गरिएका प्रयास र अबको ठोस कदमहरुका विषयमा आफ्नो प्रस्तुति राख्नु भएको थियो ।
कार्यक्रमका विशिष्ट व्यक्तित्व नेपाल उद्योग परिसंघका अध्यक्ष वीरेन्द्रराज पाण्डेले नेपालको अर्थतन्त्र वृद्धिमा उद्योगी, व्यवसायीहरुको निकै ठूलो योगदान रहेको हुँदा तीनै तहका सरकारले उद्योगी, व्यवसायीहरुलाई हेर्ने दृष्टिकोणमा परिवर्तन हुन जरुरी रहेको बताउनुभयो । पाण्डेले आफूले नेतृत्व गरेको नेपाल उद्योग परिसंघले आफू माताहतका जिल्ला तहमा रहेका संघ तथा समितिहरुसँग सहकार्यको माध्यमबाट अगाडि बढ्ने र उद्योग र उद्योगीका साझा समस्याहरुलाई समाधान गर्दै लैजाने बताउनुभयो ।
छलफल कार्यक्रममा नेपाल उद्योग परिसंघको सहकार्यमा चितवन प्रदर्शनी केन्द्रमा वर्षको एउटा मेघा एक्स्पो सञ्चालन गर्नुपर्ने, देशको आर्थिक मेरुदण्ड हिंस्सा ओगटेका रुग्ण उद्योगहरुलाई पुनः सञ्चालनको लागि राज्यलाई सुझाव प्रदान गर्नुपर्ने, उद्योग, व्यसायीहरुमा लिईदै आएको भन्सार लगायतका करका विषयमा सम्बन्धित निकायहरुसँग वहस पैरवी गर्नुपर्ने, मेटल फ्रेब्रिकेशन, कपास उद्योग, फर्निसिङ, प्रिन्टिङ, निर्माणजन्य उद्योगहरुमा देखिएका समस्याहरुको समाधानको पहल गर्नुपर्ने लगायतका विषयहरुमा छलफल गरिएको थियो ।