खैरहनी/चितवन उद्योग संघ, खैरहनी समितिको सातौंं बार्षिक साधारणसभा तथा चौंथो अधिवेशन सम्पन्न भएको छ । चितवन उद्योग संघ, खैरहनी समितिका अध्यक्ष युवराज पाठकको अध्यक्षतामा सम्पन्न कार्यक्रममा खैरहनी नगरपालिकाका नगर प्रमुख शशीकुमार खनियाँ प्रमुख अतिथि रहनुभएको थियो । प्रमुख अतिथि खनियाँले खैरहनी नगरपालिका नगरपालिका क्षेत्रभित्र सञ्चालनमा रहेका उद्योगहरुको अभिभावकीय संस्था भएकोले यहाँका उद्योग र उद्योगीहरुको समस्याहरुको समाधानको लागि सदैव तयार रहेको बताउनुभयो । उहाँले औद्योगिक प्रबद्र्धनात्मक कार्यहरुमा सहयोग गर्न आफूहरु तयार रहेको समेत बताउनुभयो ।

त्यस्तै कार्यक्रमका विशिष्ट अतिथि चितवन उद्योग संघका कार्य वाहक अध्यक्ष मदन घिमिरे, चितवन उद्योग संघ, गभर्निङ काउन्सिलका अध्यक्ष भेषराज दुवाडी लगायतले साधारणसभा तथा अधिवेशनको सफलताको शुभकामना व्यक्त गर्नुभएको थियो । चितवन उद्योग संघ, खैरहनी समितिका अध्यक्ष युवराज पाठकले स्वागत मन्तव्य सहित बार्षिक प्रतिवेदन प्रस्तुत गर्नुभएको कार्यक्रममा चितवन उद्योग संघ, खैरहनी समितिका कोषाध्यक्ष लक्ष्मी थापा खरालले आर्थिक प्रतिवेदन प्रस्तुत गर्नुभएको थियो । प्रस्तुत गरिएका प्रतिवदेन माथि छलफल भए लगत्तै सभाले पारित समेत गरेको थियो । कार्यक्रममा चितवन उद्योग संघ, खैरहनी समितिका अध्यक्ष युवराज पाठकले धन्यवाद मन्तव्य सहित समिति विघटन गर्दै निर्वाचन समितिलाई फ्लोर हस्तान्तरण गर्नुभएको थियो ।

चितवन उद्योग संघका उपाध्यक्ष गोपाल प्रसाद गैरे निर्वाचन मण्डलको संयोजक रहनुभएको निर्वाचन मण्डलको सदस्यहरुमा खैरहनी नगरपालिकाका प्रशासकीय अधिकृत नविनराज रुवाली, चितवन उद्योग संघका प्रशासकीय अधिकृत गोविन्द प्रसाद पौडेल रहनुभएको थियो ।

निर्वाचन संयोजक गैरेले नवनिर्वाचित समितिको नामावली घोषणा गर्नुभएको थियो ।

समितिको अध्यक्षमा प्रतिभा श्रेष्ठ, समितिको उपाध्यक्षहरुमा प्रकाश बस्नेत, जिनिता बस्नेत, लक्ष्मी थापा खराल, सचिवमा सुष्मा शिवाकोटी, कोषाध्यक्ष एवम् महिला अध्यक्षमा अनिता पाण्डे, युवा अध्यक्ष एवम् कार्यसमिति सदस्यमा नवराज रावल, कार्यसमिति सदस्यमा कृष्ण बहादुर बस्नेत, महिला उपाध्यक्षहरुमा रिचा थापा, मन्दिरा धरेल, महिला सचिवमा रेखादेवी मल्ल, महिला कोषाध्यक्षमा जुलिया राई, महिला सदस्यमा मनमाया पुन, त्यस्तै युवा सदस्यहरुमा देवेन्द्र चौधरी, रोशन थापा, कृति आचार्य रहनु भएको थियो । नवनिर्वाचित अध्यक्षलाई निवर्तमान अध्यक्ष र नवनिर्वाचित कार्यसमिति सदस्यहरुलाई नवनिर्वाचित अध्यक्षले सपथ खुवाउनु भएको थियो ।

कार्यक्रममा चितवन उद्योग संघ खैरहनी समितिकी नवनिर्वाचित अध्यक्ष प्रतिभा श्रेष्ठले प्रतिवद्धता मन्तव्य सहित कार्यक्रम समापन गर्नुभएको थियो ।