गैँडाकोट/गैँडाकोटस्थित अक्सफोर्ड कलेज अफ इञ्जिनियरिङ एण्ड म्यानेजमेन्ट (OCEM) ले आगामी श्रावण २५, २६ र २७ गते आयोजना गर्न लागेको “Oxford Mela 2025” र कलेजका प्रमुख सल्लाहकार तथा शिक्षासेवी स्व. राम प्रसाद चापागाईं “चञ्चल”को स्मृतिमा घोषणा गरिएको ‘राम प्रसाद “चञ्चल” छात्रवृत्ति योजना’ सम्बन्धी विशेष पत्रकार सम्मेलन सम्पन्न गरेको छ।
कलेजका प्रिन्सिपल प्रा.डा. ई. हरि भण्डारीको अध्यक्षतामा आयोजित सम्मेलनमा कलेजका हालसम्मका शैक्षिक यात्राको समीक्षा गर्दै भविष्यप्रतिको प्रतिबद्धता व्यक्त गरिएको थियो। उहाँले विगत २५ वर्षदेखि गुणस्तरीय, व्यवहारिक र उद्योगमैत्री शिक्षा प्रदान गर्दै आएको संस्थाले अब “Oxford Mela 2025” मार्फत युवाहरूमाझ सिर्जनशीलता, नेतृत्व क्षमता र करियर मार्गदर्शनको अवसर सिर्जना गर्न खोजेको स्पष्ट पार्नुभयो।
मेलामा +2 सकेका १६ देखि २१ वर्ष उमेर समूहका विद्यार्थीहरूलाई लक्षित गरी कोड वार, ब्रिज मोडलिङ, सर्किट डिजाइन, व्यापार प्रस्तुति, पोस्टर डिजाइन, क्विज, पब्लिक स्पिकिङ, प्यानल छलफल, करियर गाइडेन्स, PUBG तथा बास्केटबल टुर्नामेन्ट लगायतका प्रतियोगितात्मक तथा जानकारीमूलक कार्यक्रमहरू सञ्चालन हुनेछन्। इभेन्ट संयोजक ई. शिशिर कुँवरका अनुसार, यो मेला OCEM का स्नातक तहका कार्यक्रमहरू (BBA, BCA, BE, BHM) को प्रचार–प्रसार, विद्यालय–समुदायसँगको सम्बन्ध सुदृढीकरण र कलेजको ब्रान्ड मूल्य अभिवृद्धिको दीर्घकालीन उद्देश्यसँग गाँसिएको छ।
यही अवसरमा, कलेजले शिक्षामा समर्पित प्रमुख सल्लाहकार स्व. राम प्रसाद चापागाईं (चञ्चल) को १३औँ पुण्य तिथिको अवसरमा उहाँको स्मृतिमा ‘चञ्चल छात्रवृत्ति योजना’ पनि सार्वजनिक गरेको छ। उक्त योजना अन्तर्गत BE Civil तथा BE Electrical & Electronics अध्ययनरत एक छात्र र एक छात्रालाई पूर्ण छात्रवृत्ति प्रदान गरिनेछ। छात्रवृत्तिको कुल वार्षिक मूल्य रु. २० लाख ४५ हजार हुनेछ। छनोट प्रक्रियामा शैक्षिक योग्यता, आर्थिक अवस्था र अनुशासनलाई मूल्याङ्कनका मापदण्ड बनाइनेछ।
कार्यक्रमको सञ्चालन गरेका भाइस प्रिन्सिपल कृष्णहरि पौडेलले शिक्षा क्षेत्रमा सञ्चारकर्मीहरूको योगदानको उच्च प्रशंसा गर्दै पत्रकारहरूलाई निरन्तर सहयोग र सहकार्यको लागि धन्यवाद व्यक्त गर्नुभयो। उहाँले शिक्षा, अनुसन्धान र नवप्रवर्तनलाई केन्द्रमा राख्दै अक्सफोर्ड कलेजको आगामी यात्रालाई अझै प्रभावकारी बनाउने प्रतिबद्धता पनि व्यक्त गर्नुभयो।
