रत्ननगर/कालिका नगरपालिकाका नगर प्रमुख विनोद रेग्मी र जिल्ला प्रहरी कार्यालय चितवनका प्रमुख गोविन्द पुरीले प्रहरी चौकी जुटपानीको अनुगमन गरेकाछन् । अनुगमनका क्रममा कालिका ७ मा रहेको प्रहरी चौकी जुटपानीमा प्रहरी अधिकृत दरबन्दी, प्रहरीको दैनिक गतिविधि, समस्या, स्थानीयसंग प्रहरीको समन्वय लगायतका बिषयमा जिल्ला प्रहरी कार्यालय चितवनका प्रमुख पुरीसंग नगर प्रमुख रेग्मीले छलफल गर्नुभएको थियो । प्रतिक्रिया स्वरूप प्रहरी प्रमुख पुरीले कालिका नगरपालिकामा छिट्टै प्रहरी अधिकृत आउने कुरा बताएका छन् । नेपाल प्रहरीको इतिहास गर्व गर्न लायक रहेको उल्लेख गर्दै सीमित साधन स्रोतका बाबजूद पनि शान्ति सुरक्षा कायम गर्न, अपराध अनुसन्धान एवम् विपद्को समयमा उद्दार गर्न, जोखिमबाट बचाउन नेपाल प्रहरीले निर्वाह गरेको भूमिका महत्वपूर्ण रहेको उनले बताए । कालिका नगरपालिकामा शान्ति सुरक्षाको सुदृढीकरणका लागि लामो समयदेखि स्थानीय जनप्रतिनिधिहरूले यस्तो माग राख्दै आएका थिए । सोही क्रममा बोल्दै नगर प्रमुख रेग्मीले एक हप्ता वा दश दिन भित्र प्रहरी चौकी जुटपानीमा प्रहरी अधिकृत आउने जानकारी दिए । उनले भने, “प्रहरी अधिकृत आउँदा न्यूनतम पूर्वाधार निर्माण, गाडी मर्मत, अन्य अफिसमा आवश्यक पर्ने सामग्रीहरू नगरपालिकाले सहयोग गर्नेछ । ” धेरै वर्षको प्रयासपछि सफल हुने चरणमा पुगेकोमा नगर प्रमुख रेग्मीले खुसी व्यक्त गरे । गत साउन १४ गते नेपाल प्रहरीका महानिरीक्षक (आईजीपी) दिपक थापा र कालिका नगरपालिकाका मेयर विनोद रेग्मीबिच भरतपुरमा एक महत्त्वपूर्ण भेटवार्ता भएको थियो । भेटका क्रममा मेयर रेग्मीले कालिका नगरपालिकामा ईन्पेक्टरको दरबन्दीसहितको प्रहरी चौकी स्थापनाको विषयमा चासो राखेका थिए । प्रहरी चौकी अनुगमनका क्रममा उपप्रमुख विमला तामाङ, नगरका प्रवक्ता तथा कालिका २ का वडा अध्यक्ष लक्ष्मण पौडेल, कालिकाका शाखा अधिकृत प्रकाश चन्द्र पौडेल, ईलाका प्रहरी कार्यालय रत्ननगर टाँडीका डिएसपी रञ्जन अवा, प्रहरी चौकी जुटपानी, प्रहरी चौकी खोलेसिमल, प्रहरी चौकी पदमपुरका प्रहरी प्रमुख र प्रहरीहरुको सहभागिता रहेको थियो ।