रोटरी क्लब अफ चितवनले आफ्नो ३४औं पदस्थापन समारोह २०८२ साउन १० गते (२५ जुलाई २०२५) भरतपुर गार्डेन होटेल मा भव्य रूपमा सम्पन्न गरेको छ। कार्यक्रमको अध्यक्षता क्लबका ३५ औं अध्यक्ष रो. रामचन्द्र अधिकारीले गर्नुभएको थियो भने कार्यक्रममा आर.आई. जिल्ला ३२९२ का जिल्ला गभर्नर रो. विनोद पोखरेल प्रमुख अतिथि रहनु भएको थियो। विशेष अतिथिहरूमा पूर्व जिल्ला गभर्नर रो. रविन्द्र कुमार पिया, रो. संजय गिरि र रो. जितेन्द्र बहादुर राजभण्डारी, जोन ३४ का एसिस्टेन्ट गभर्नर रो धन बहादुर श्रेष्ठ रहनु भएको थियो।

कार्यक्रममा रोटरी वर्ष २०२५/२६ का लागि नव निर्वाचित बोर्ड सदस्यहरूले पद तथा गोपनियताको सपथ ग्रहण गरेका थिए। निवर्तमान अध्यक्ष रो. भानु शर्माले २०२४/२५ मा विशिष्ट योगदान पुर्‍याएका रोटेरियनहरूलाई सम्मान गर्नुभयो।  संस्थापक अध्यक्ष रो. के.एल. भूषण प्रधानले रोटरी भवन निर्माण सम्पन्न गर्नका लागि रु. १५ लाखको चेक हस्तान्तरण गर्नुभयो। २०२४/२५ मा सम्पन्न कार्यक्रमहरूबारे समेत कार्यक्रममै प्रकाश पारिएको थियो। प्रथम उपाध्यक्ष रो. राजन पियाले क्लबबाट The Rotary Foundation मा गरिएको योगदान र क्लबबाट शुरू गरिएका Global Grant Projectsहरूको संक्षिप्त प्रतिवेदन प्रस्तुत गर्नुभयो।
सबै अतिथिहरूले निवर्तमान अध्यक्ष तथा टिमलाई उत्कृष्ट कार्यका लागि बधाई दिँदै नव निर्वाचित बोर्डलाई सफल कार्यकालका लागि शुभकामना व्यक्त गर्नुभयो। कार्यक्रममा १२० भन्दा बढी रोटेरियन, रोटरएक्टर, जीवनसाथीहरू तथा एननेट्सहरूको उपस्थिति रहेको थियो। समारोहपश्चात सामूहिक भेटघाट तथा डिनर कार्यक्रम पनि सम्पन्न गरिएको थियो।