अमिर रामदाम,
भरतपुर/धर्म संस्कृतिसंग जोडिएको सुनलाई विलासिता सम्झनु सरकारको गलत दृष्टिकोण रहेको  चितवन क्षेत्र नम्बर १ का प्रतिनिधि सभा सदस्य माननीय हरि ढकालले बताउनुभयो।  नेपाल सुनचाँदी व्यवसायी संघ चितवनले आज शुक्रबार उद्योग वाणिज्य संघ चितवनको बैठक हलमा आयोजना गरेको छलफल तथा भेटघाट कार्यक्रममा चितवन क्षेत्र नम्बर १ का प्रतिनिधि सभा सदस्य माननीय हरि ढकालले सो कुरा बताउनु भयो। उहाँले राज्यको अर्थतन्त्रमा महत्वपूर्ण टेवा पुर्याउने सुनचाँदी व्यवसायलाई सकाउने खेलमा सरकार रहेको आरोप लगाउनुभयो।  सरकारले सुन तस्करी झन् हाबी हुनेगरी कर नीतिहरु ल्याएको उहाँले बताउनुभयो।

सरकारको स्वयं आफ्नो कारणले देश ग्रे-लिस्टमा पुगेको हो तर ग्रे-लिस्टबाट देशलाई निकाल्न सुनमा विलासिता लगाएको भन्नु सरकारको अर्थहिन तर्क रहेको उहाँले जनाउनु भयो । छलफल कार्यक्रममा नेपाल सुनचाँदी व्यवसायी महासंघका सचिव टुलकप्रसाद विश्वकर्माले राज्यले सुन व्यवसायीलाई आश्वासन दिएर पनि झुलाउने काम गरिरहेको बताउनुभयो।  उहाँले राज्यको यस रवैयाको खेद प्रकट गर्नुभयो।  सरकारले राज्यलाई अत्याधिक कर बुझाउने सुनचाँदी व्यवसायीप्रति पूर्वाग्रह राख्नु दु:खद् करा रहेको उहाँले बताउनुभयो।  यद्यपी यस विलासिता कर लागू भएमा मुलुकमा थप कालोबजारी मौलाउने उहाँले औल्याउनु भयो ।  यदि यस कर नीतिहरु कायम भएमा तराई बेल्टका सुनचाँदी व्यवसाय पूरा विस्तापित हुने उहाँले बताउनुभयो।
त्यस्तै सुनलाई नगदसरह मान्यता दिएको बेला विलासिता लगाउनु अव्यवहारिक रहेको उद्योग वाणिज्य संघ चितवनका पूर्व अध्यक्ष राजन गौतमले बताउनुभयो। व्यवसाय गर्ने मान्छेले अहिले आन्दोलन गर्न पर्ने अवस्था आउनु दु:खद् रहेको उहाँले भन्नुभयो ।
सुनमा लगाइएको विलासिता कर व्यवसाती तथा उपभोक्ताको निम्ति समेत अहित देखिएको कारण यथासिघ्र सरकारले पुर्नविचार गर्नुपर्ने उद्योग वाणिज्य संघ चितवनका वरिष्ठ उपाध्यक्ष चिरञ्जीवी सुवेदीले बताउनुभयो।  सरकारको यस कर नीतिका कारण नेपाल भन्दा भारतको सुनचाँदी बजार फस्टाउने उहाँले बताउनुभयो।
कार्यक्रममा नेपाल सुनचाँदी व्यवसायी महासंघकी केन्द्रीय सदस्य ऋतु सेन्चुरी, राष्ट्रिय उपभोक्ता मञ्च चितवनका उपाध्यक्ष प्रेम गैरे, नेपाल सुनचाँदी व्यवसायी संघ चितवनका सल्लाहकार ज्ञानेन्द्रमान शाक्यले आफ्नो धारणा व्यक्त गर्नुभएको थियो भने माननीय सांसद ढकाललाई संघको तर्फबाट ज्ञापन पत्र कार्यक्रमको अध्यक्षता समेत गर्नुभएका संघका अध्यक्ष हेमबहादुर विश्वकर्माले हस्तान्तरण गर्नुभएको थियो। कार्यक्रमको सहजीकरण संघका महासचिव गोपाल बहादुर वि.क थापाले गर्नुभएको थियो।