अमिर रामदाम,

भरतपुर/सुनचाँदी व्यवसायीहरूले चितवनको भरतपुरमा वृहत विरोध प्रदर्शन गरेका छन्। नेपाल सुनचाँदी व्यवसायी संघ चितवन, चितवन सुनचाँदी व्यवसायी संघ पूर्वी चितवन, रत्ननगर सुनचाँदी व्यवसायी संघ (नगर संघ) ले सुनमा लगाइएको दुई प्रतिशत विलासिता कर खारेजीको माग गर्दै प्रदर्शन गरेका हुन्। उनीहरूले सुनमा लगाइएको दुई प्रतिशत विलासिता कर र हिरा पत्थरमा लगाइएको १३ प्रतिशत भ्याट खारेज गर्न माग गरेका छन् ।
प्रदर्शनका क्रममा नेपाल सुनचाँदी व्यवसायी संघ चितवनका अध्यक्ष हेमबहादुर विश्वकर्माले सुनचाँदी महँगो भइरहेको बेलामा सरकारले विलासिता कर लगाउनु अव्यवहारिक भएको बताउनु भयो। नेपाल सुनचाँदी रत्न तथा आभुषण महासंघका तृतीय उपाध्यक्ष प्रेम खातीले विलासिता कर र हिरा तथा हिराजडित गहनामा लगाइएको भ्याट खारेज नभएसम्म आन्दोलन जारी राख्ने बताउनु भयो। नेपाल सुनचाँदी व्यवसायी महासंघका सचिव टुलकप्रसाद विश्वकर्माले देशभित्र हजारौँलाई रोजगारी दिइरहेको यस क्षेत्रलाई सरकारले डुबाउने नियतले कर नीति लिएको आरोप लगाउनु भयो।  उहाँले भन्नुभयो, ‘सुनमा २ प्रतिशत र हिरा तथा पत्थरमा १३ प्रतिशत भ्याट लगाइनु गलत हो। ’

संयुक्त विरोध र्‍याली तथा खबरदारी सभामा  राष्ट्रिय उपभोक्ता मञ्च चितवनका अध्यक्ष जीवलाल पुरी, उद्योग वाणिज्य संघ चितवनका वरिष्ठ उपाध्यक्ष चिरञ्जीवी सुवेदीले सुनचाँदी व्यवसायीहरूको जायज मागहरु सरकारले यथासिघ्र सम्बोधनगर्नुपर्ने बताउँदै विरोध कार्यक्रमलाई ऐक्यबद्धता प्रस्तुत गर्नुभएको थियो । खबरदारी सभामा नेपाल सुनचाँदी व्यवसायी महासंघका प्रवक्ता अधिवक्ता जीवन ज्योति विश्वकर्मा, नेपाल सुनचाँदी व्यवसायी संघ चितवनका निवर्तमान अध्यक्ष डा.यमबहादुर वि.के, चितवन सुनचाँदी व्यवसायी संघ पूर्वी चितवनका अध्यक्ष विष्णु लकाई सुनार, रत्ननगर सुनचाँदी व्यवसायी संघ(नगर संघ) का अध्यक्ष दिपक सेन्चुरीले मन्तव्य व्यक्त गर्नुभएको थियो ।

संयुक्त विरोध र्‍याली बालकुमारी चोक-मिलनरोड-सहिदचोक-लायन्सचोक-वीरेन्द्र क्याम्पस गेट हुँदै चौबिसकोटीमा पुगेर खबरदारी सभामा परिणत भएको थियो।  खबरदारी सभामा नेपाल सुनचाँदी व्यवसायी संघ चितवनका अध्यक्ष एवम् संयुक्त आन्दोलन परिचालन समितिका संयोजक हेमबहादुर विश्वकर्माले अध्यक्षता गर्नुभएको थियो भने कार्यक्रमलाई सहजीकरण संघका महासचिव एवम् आन्दोलन परिचालन समितिका सदस्य सचिव गोपाल बहादुर वि.क थापाले गर्नुभएको थियो।