चितवन/नेकपा (एमाले) राप्ती नगरपालिका वडा नम्बर ६ कमिटी चितवनले अशक्त परिवारका लागि घर निर्माण गरिदिएको छ । राप्ती ६ मुडाभारका सुरदेश र सृष्टिी महतोको परिवारका लागि घर निर्माण गरिएको हो । निर्माण सम्पन्न भएपछि शुक्रबार एक कार्यक्रमका बीच एमालेले परिवारलाई घर हस्तान्तरण गरेको छ । सो घरको शिलान्यास बैशाख १८ गते परेको श्रमिक दिवसको दिन गरिएको थियो ।
नेकपा एमालेले सञ्चालन गरेको जरा अभियान अन्तर्गत महतो परिवारलाई आवास निर्माण गरेर हस्तान्तरण गरिएको एमाले चितवनका जिल्ला कमिटी सदस्य एवम् राप्ती ६ इन्चार्ज उत्तम सेढाइले जानकारी दिए । स्थानीय नेता कार्यकर्ताको आर्थिक सहयोग एवम् श्रमदान र पार्टी पंक्तिको सहयोगमार्फत घर निर्माण गरिएको सेढाईले जानकारी दिए ।

घर हस्तान्तरण कार्यक्रममा नेकपा एमाले केन्द्रीय सदस्य प्रभा बराल, एमाले बागमती प्रदेश उपाध्यक्ष दावा दोर्जे लामा, एमाले चितवनका अध्यक्ष कमल पाठक लगायतका नेता कार्यकर्ताको उपस्थिति रहेको थियो । हस्तान्तरण कार्यक्रममा बोल्दै केन्द्रीय सदस्य बरालले एमाले पार्टी जनताको सुखदुखको साथी रहेको बताउँदै यस्ता अनुकरणीय कामले पार्टीलाई थप मजबुत बनाउँदै लग्ने बताइन् । उनले जनतासँग निरन्तर सम्पर्कमा रहन स्थानीय नेता कार्यकर्तालाई निर्देशन समेत दिएकी छन् ।
जिल्ला कमिटी सदस्य सेढाईको अध्यक्षतामा सम्पन्न हस्तान्तरण कार्यक्रममा राप्ती ६ का वडा कमिटी अध्यक्ष शिव नारायण चौधरीले स्वागत मन्तव्य राखेका थिए भने कार्यक्रम सञ्चालन सुजन थापाले गरेका थिए । राप्ती नगरपालिका ६ वडा कमिटी पार्टी राजनीतिसँगै सामाजिक काममा पनि बढी सक्रिय हुँदै आएको छ । वडा कमिटीले गत जाडोमा राष्ट्रिय आधारभुत विद्यालय राप्ती ६ पडरियामा न्यानो कपडा एवम् शैक्षिक सामग्री हस्तान्तरण गरेको थियो ।